અમદાવાદમાં હજુ વરસાદે સરખી માઝા પણ નથી મૂકી ત્યાં તો રસ્તાઓ અને બ્રિજમાં ગાબડાં પડવાની શરુઆત થઈ ગઈ છે. 17 વર્ષ જૂના ચાણક્યપુરી ઓવરબ્રિજમાં ગાબડું પડ્યાના ફોટો-વીડિયો વાઈરલ થતાં AMCને આજે દોટ મૂકવાનો વારો આવ્યો. બ્રિજની ઉપરની ભાગે ડામર ઉખડી ગયો, સળિયા પણ દેખાવા લાગ્યા છતાં પણ બ્રિજ પ્રોજેક્ટના અધિકારીઓના ધ્યાને આ ખાડો આવ્યો નહોતો. શહેરના ઘાટલોડિયા વિસ્તારમાં આવેલા ચાણક્યપુરી ઓવરબ્રિજ પર થોડા દિવસ પહેલા ડામર ઉખડી ગયો અને ખાડો પડ્યો હતો.
જે ખાડો ધીમે-ધીમે મોટો થતો ગયો હતો અને બ્રિજના સળિયા દેખાવા લાગે એવા ખાડામાં પરિવર્તિત થઈ ગયો હતો. આ ખાડાના કારણે અનેક વાહનચાલકોને અવરજવરમાં તકલીફ પડી રહી હતી. બ્રિજ પરના ખાડાના આ ફોટો-વીડિયો વાઈરલ થતાં મ્યુનિસિપલ કોર્પોરેશન તંત્રના ધ્યાને આ વાત આવી અને તુરંત જ ખાડાને પુરવાની કામગીરી હાથ ધરવામાં આવી હતી.
આ ઘટના અંગે ડેપ્યુટી મેયર અને ઘાટલોડિયા વોર્ડના કોર્પોરેટર જતીન પટેલનો સંપર્ક સાધતા તેઓએ જણાવ્યું હતું કે, આ બ્રિજ 17 વર્ષ જૂનો છે. ઔડા દ્વારા આ બ્રિજ બનાવવામાં આવ્યો હતો. મ્યુનિસિપલ કોર્પોરેશનની હદમાં બ્રિજનો સમાવેશ થયો ત્યારથી લઇ આજદિન સુધી એક પણ રૂપિયાનું રીપેરીંગ કરવાની જરૂરિયાત આ બ્રિજમાં થઈ નથી. સૌપ્રથમવાર આ બ્રિજ પર ખાડો પડ્યો છે.
ડામરનો ભાગ ઉખડી ગયો તો એટલે સળિયા દેખાવા લાગ્યા હતા. બ્રિજની નીચે સુધી દેખાય એવું ગાબડું પડ્યું નથી. તાત્કાલિક ધોરણે આ બાબતે અધિકારીઓનું ધ્યાન દોરવામાં આવ્યું હતું અને ખાડો પૂરી દેવામાં આવ્યો છે.