ડાક વિભાગ દ્વારા ફિલાટેલીને પ્રોત્સાહન આપવા “દીનદયાળ સ્પર્શ શિષ્યવૃત્તિ યોજના” કાર્યરત : શ્રી કૃષ્ણકુમાર યાદવ
સરકારના ડાક વિભાગ દ્વારા ડાક ટીકીટ સંગ્રહ અથવા ફિલાટેલી ક્ષેત્રમાં અનેક નવા પગલાં લેવામાં આવી રહ્યા છે. તેનો ઉદ્દેશ્ય ડાક ટીકીટના માધ્યમથી બાળકોમાં સર્જનાત્મકતાના વિકાસની સાથેસાથે બાળકોને વિવિધ સમકાલીન વિષયો, ઘટનાઓ, દેશના વ્યક્તિત્વો, જૈવ વિવિધતા વગેરેથી પરિચિત કરવાનો છે. શિક્ષણ પ્રણાલીને મજબૂત બનાવવામાં ફિલાટેલીનું યોગદાન મહત્વપૂર્ણ છે. રાજકોટ પરિક્ષેત્રના પોસ્ટ માસ્ટર જનરલશ્રી કૃષ્ણકુમાર યાદવે સેન્ટ પોલ સ્કૂલના રજતજયંતી વર્ષ નિમિત્તે તા. ૧૨મી નવેમ્બરના રોજ વિશેષ આવરણનું વિમોચન કરતી વખતે ઉપરોક્ત વિચારો વ્યક્ત કર્યા હતા.
પોસ્ટમાસ્ટર જનરલશ્રી કૃષ્ણકુમાર યાદવે કહ્યું કે ડાક ટીકીટ ભૂતકાળને વર્તમાન સાથે જોડે છે. ડાક ટીકીટને ‘‘નન્હા રાજદૂત’’ કહેવામાં આવે છે, જે વિવિધ દેશોમાં ભ્રમણ કરે છે અને સંસ્કૃતિ, પરંપરા અને વારસાથી પરિચિત કરાવે છે. દરેક ડાક ટીકીટ પાછળ એક વાર્તા છુપાયેલી હોય છે અને આજની યુવા પેઢીને આ વાર્તા સાથે જોડવાની જરૂર છે. અનેક સંસ્થાઓ આ પ્રક્રિયામાં મહત્વપૂર્ણ ભૂમિકા ભજવી રહી છે. આ જ શ્રેણીમાં એક નવી પહેલ તરીકે ડાક વિભાગ વિવિધ શાળાઓમાં ફિલાટેલી ક્લબ ખોલી રહ્યું છે. જેથી, વિદ્યાર્થીઓમાં ડાક ટીકીટ સંગ્રહ કરવાની રુચિ વિકાસ પામે. તેનાથી વિદ્યાર્થીઓના શિક્ષણમાં પણ ફાયદો થશે. ડાક ટીકીટ સંગ્રહ (ફિલાટેલી)ને શિક્ષણ પ્રણાલીની મુખ્ય ધારામાં લાવવા અને પ્રોત્સાહન આપવા માટે ડાક વિભાગ દ્વારા વર્ગ ૬ થી ૯ સુધીના બાળકો માટે વાર્ષિક ૬૦૦૦ રૂપિયાનો લાભ આપતી “દીનદયાળ સ્પર્શ શિષ્યવૃત્તિ યોજના” શરૂ કરવામાં આવી છે.
પોસ્ટમાસ્ટર જનરલશ્રી કૃષ્ણકુમાર યાદવે વિદ્યાર્થીઓને સંબોધતા જણાવ્યું કે ફિલાટેલીમાં રસ રાખતાં લોકો વિવિધ વિષયો પર ડાક ટીકીટોનું સંગ્રહ કરી શકે છે. સંચારના બદલતા દોરમાં આજની યુવા પેઢી સોશિયલ મીડિયાને વધુ પ્રાથમિકતા આપી રહી છે, પરંતુ બાળકોને ફિલાટેલી સાથે નક્કી જ જોડાવું જોઈએ. જેનાથી તેમના સામાન્ય જ્ઞાનમાં પણ વધારો થશે.
આ તકે સ્કૂલના પ્રિન્સીપાલશ્રી ફાધર જેમ્સે પ્રાસંગિક ઉદબોધન આપ્યું હતું. કાર્યક્રમમાં રાજકોટ મંડળના ડાકઘર પ્રવર અધિક્ષકશ્રી એસ. કે. બુનકર, સિનિયર પોસ્ટ માસ્ટરશ્રી અભિજીત સિંહ અને સેન્ટ મેરી સ્કૂલના પૂર્વ પ્રિન્સીપાલ ફાધર બિનોય પણ ઉપસ્થિત રહ્યા હતા, તેમ પોસ્ટ ઓફિસની યાદીમાં જણાવાયું છે.