ભારત સરકાર દ્વારા ૬૮ મી સ્કૂલ ગેમ ફેડરેશન ઓફ ઇન્ડિયા દ્વારા આયોજિત ગુજરાત સરકાર અંડર -14 બેઝબોલ રમતમાં ભાઈઓની સ્પર્ધા ડીસા (બનાસકાંઠા ) મુકામે રાજ્યકક્ષાનું આયોજન જિલ્લા રમત ગમત અધિકારીશ્રી ગાંધીનગર દ્વારા થયેલ. તારીખ ૧૨-૧૧-૨૪ રોજ યોજાયેલ આ સ્પર્ધામાં અમરેલી જિલ્લાની ટીમમાં શ્રી સ્વામિનારાયણ ગુરુકુળ સાવરકુંડલા સંસ્થાની સમગ્ર સ્કૂલની ટીમ ગુજરાત રાજ્યમાં ઝળહળતું બીજું સ્થાન મેળવી શ્રી સ્વામિનારાયણ ગુરુકુળ સાવરકુંડલાનું નામ રોશન કરેલ છે.
જેમાં ગુરુકુળ શાળાનાં રમતગમતનાં કોચ તરીકે દીપકભાઈ વાળા તથા ઝાલાભાઈએ ખૂબજ તનતોડ મહેનત કરી વિજય મેળવ્યો છે તેમજ તેઓ વિદ્યાર્થીઓનાં સર્વાગી વિકાસમાં ખૂબજ સક્રિય ભૂમિકા ભજવી રહ્યા છે. ગુરુકુળ શાળાની ટીમ વિજેતા થતાં ગુરુકુળ સંસ્થાના વડા પૂજ્ય ભગવત પ્રસાદ દાસજી સ્વામી તથા ગુરુકુળનાં પ્રમુખ શાસ્ત્રી હરિપ્રસાદ દાસજી સ્વામી તથા કોઠારી સ્વામી શ્રી અક્ષર મુક્ત સ્વામી, શાળાના ટ્રસ્ટીશ્રીઓ તેમજ વિવિધ શાળાનાં પ્રિન્સિપાલશ્રીઓ દ્વારા તમામ વિજેતાઓને હાર્દિક અભિનંદન પાઠવવામાં આવ્યા હતા.
આ તકે સાવરકુંડલાના ધારાસભ્ય અને ભારત સરકાર સ્કૂલ ફેડરેશન ઓફ ઇન્ડિયા બેઝ બોલનાં પ્રમુખ માનનીય મહેશભાઈ કસવાલાનો આભાર વ્યકત કરવામાં આવેલ તેમજ ગુજરાત બેઝબોલ ફેડરેશન ઓફ ઈન્ડીયાનાં સેક્રેટરી અનિકેતભાઈ તેમજ ફેડરેશનના હોદેદારશ્રીઓનો પણ ખૂબ આભાર માનવામાં આવેલ .
બિપીન પાંધી