સાઉદી અરેબિયાના મક્કામાં હજ કરવા ગયેલા 922 લોકોના ગરમીના કારણે મોત થયા છે. ન્યૂઝ એજન્સી એએફપીએ અલગ-અલગ દેશોના ડેટાના આધારે આ જાણકારી આપી છે. એક અરબ રાજદ્વારીએ જણાવ્યું કે, માર્યા ગયેલા લોકોમાં લગભગ 600 શ્રદ્ધાળુઓ તો ખાલી ઇજિપ્તના હતા અને 1400 લોકો હજુ પણ ગુમ છે.
જો કે, સાઉદી અરેબિયાથી વિપરીત મૃત્યુની સંખ્યા અંગે હજુ સુધી કોઈ પુષ્ટિ કરવામાં આવી નથી. મધ્ય પૂર્વમાં આકરી ગરમી વચ્ચે મક્કામાં 17 જૂને તાપમાન 51.8 ડિગ્રી સેલ્સિયસ નોંધાયું હતું. જ્યારે 18મી જૂને ગરમીનો પારો 47 ડિગ્રીએ રહેતાં થોડી રાહત મળી હતી.
અહેવાલ મુજબ, 12 થી 19 જૂન સુધી ચાલનારી હજ દરમિયાન 68 ભારતીય હજયાત્રીઓના પણ મોત થયા છે. હજ કમિટી ઓફ ઈન્ડિયાના જણાવ્યા અનુસાર આ વર્ષે મહત્તમ 1,75,000 ભારતીયો હજ યાત્રા માટે મક્કા પહોંચ્યા હતા. કેરળના હજ મંત્રી અબ્દુરહીમાને બુધવારે કેન્દ્ર સરકારને ભારતીયોની સુરક્ષા માટે જરૂરી પગલાં ભરવાની માગ કરી હતી.
મીડિયા રિપોર્ટ્સ અનુસાર, આ માટે તેણે વિદેશ મંત્રી એસ જયશંકર અને જેદ્દાહમાં ભારતીય વાણિજ્ય દૂતાવાસને પત્ર લખ્યો હતો. કેરળના લગભગ 18 હજાર 200 હાજીઓ સાઉદી અરેબિયા ગયા હતા.
મંત્રી અબ્દુરહીમાને લખ્યું છે કે, જેદ્દાહ પહોંચ્યા બાદ હજયાત્રીઓને ઘણી સમસ્યાઓનો સામનો કરવો પડ્યો હતો. તેમને 30 કિમી દૂર અસિસી જવા માટે કલાકો સુધી રાહ જોવી પડી. આ સિવાય ત્યાં રહેવાની વ્યવસ્થા પણ યોગ્ય રીતે કરવામાં આવી ન હતી.
એએફપીના જણાવ્યા અનુસાર મૃત્યુ પામેલા શ્રદ્ધાળુઓમાં ઈન્ડોનેશિયા, જોર્ડન, ઈરાન અને ટ્યુનિશિયાના નાગરિકો છે. સાઉદી રાજદ્વારીઓએ સમાચાર એજન્સી એએફપીને જણાવ્યું હતું કે, મૃત્યુ પામેલા લોકોમાં ઇજિપ્તીયન યાત્રાળુઓની સંખ્યા વધુ છે કારણ કે તેમાંથી ઘણાએ હજ માટે નોંધણી કરાવી ન હતી.