સ્ટાર રેસલર વિનેશ ફોગાટે 3 કલાકના સંઘર્ષ બાદ નેશનલ વુમન રેસલિંગ ટ્રાયલ્સ જીતી લીધી છે. તેણે 50 કિગ્રા વેઇટ કેટેગરીમાં શિવાની પવારને 11-6 થી હરાવી હતી. હવે તે આવતા મહિને યોજાનારી એશિયન ઓલિમ્પિક ક્વોલિફાયર્સમાં ભારતીય ટીમનો ભાગ બનશે.
અગાઉ, વિનેશે પટિયાલા સેન્ટર ઓફ સ્પોર્ટ્સ ઓથોરિટી ઓફ ઈન્ડિયા (SAI) ખાતે 50 KG અને 53 KG વેઈટ કેટેગરીની મેચ લગભગ ત્રણ કલાક સુધી શરૂ થવા દીધી ન હતી. આ બંને વેઇટ કેટેગરીમાં ભાગ લેવા માટે તે સંમત થયા પછી, ટ્રાયલ બપોરે 1:30 વાગ્યે શરૂ થઈ શક્યા.
હોબાળાનું કારણ શું હતું?
વિનેશ અધિકારીઓ પાસેથી 53 KG વેઇટ કેટેગરીની અંતિમ ટ્રાયલ ઓલિમ્પિકથી પહેલાં ફરીથી કરાવવાનું લેખિત આશ્વાસન અથવા ફરી બંને કેટેગરીમાં લડવાની મંજૂરી આપવાની માગ કરી રહી હતી. ફરી વખત ટ્રાયલ કરાવવા પાછળ વિનેશનું કહેવું હતું કે જો WFIના હાથમાં ફરીથી કમાન આવી ગઈ, તો પસંદગીની પોલિસી બદલી શકે છે. પછી એડહોક કમિટીએ તેને બંને કેટેગરીમાં લડવાની મંજૂરી આપી.
IOA દ્વારા રચિત એડ-હોક બોડીએ પહેલાથી જ કહ્યું છે કે 53 કિગ્રા વર્ગ માટે અંતિમ ટ્રાયલ થશે, જેમાં આ વજન વર્ગના ટોચના 4 કુસ્તીબાજો સ્પર્ધા કરશે. ટ્રાયલના વિજેતાને ફાઇનલમાં ભાગ લેવો પડશે અને વિજેતા કુસ્તીબાજ ભારતનું પ્રતિનિધિત્વ કરશે.
વિનેશ બે કેટેગરીમાં ભાગ લઈ રહી છે, આ પ્રથમ વખત છે
ભૂતપૂર્વ WFI પ્રમુખ બ્રિજભૂષણ શરણ સિંઘ સામે જાતીય સતામણીના આરોપો મૂકનાર અને લાંબા સમયથી ચાલતા વિરોધનું નેતૃત્વ કરનાર વિનેશ બે વજન કેટેગરીમાં (50 અને 53 KG) સ્પર્ધા કરી રહી છે. આવું પહેલીવાર થઈ રહ્યું છે જ્યારે કોઈ કુસ્તીબાજ આખી ટુર્નામેન્ટમાં એક સાથે બે વજનની કેટેગરીમાં ભાગ લઈ રહી હોય. સામાન્ય રીતે, ટ્રાયલ્સમાં એક વજન કેટેગરીમાં હાર્યા પછી, કુસ્તીબાજ અન્ય વજન કેટેગરીમાં કુસ્તી કરે છે.
વિનેશ સામે કુસ્તીબાજો આવ્યા
વિનેશ બે વેઇટ કેટેગરીમાં રમવાને કારણે 50 કિલોગ્રામમાં ભાગ લેનાર ઘણા કુસ્તીબાજોએ વિરોધ શરૂ કર્યો. એક કુસ્તીબાજ બોલ્યો- ‘અમે અઢી કલાકથી રાહ જોઈ રહ્યા છીએ.’ વિનેશે લેખિત ખાતરી સાથે 50 KG અને 53 KG બંનેમાં ભાગ લેવાની પરવાનગી માગી હતી, જેના કારણે એક અજીબ પરિસ્થિતિ સર્જાઈ હતી.
બજરંગ અને દહિયા એક દિવસ પહેલા હારી ગયા હતા
એક દિવસ પહેલા સોનીપતમાં આયોજિત રાષ્ટ્રીય ટ્રાયલ દરમિયાન, સ્ટાર કુસ્તીબાજો બજરંગ પુનિયા અને રવિ દહિયા મેન્સ નેશનલ ટ્રાયલ્સના સેમિ-ફાઇનલ રાઉન્ડમાંથી બહાર થઈ ગયા હતા.