ગાંધીનગરના મહાત્મા મંદિરમાં વિશ્વ ધ્યાન દિવસની ઉત્સાહપૂર્ણ ઉજવણી દરમિયાન મુખ્યમંત્રી ભૂપેન્દ્ર પટેલએ યોગ અને ધ્યાનની પ્રાચીન ભારતીય પરંપરાને સ્વસ્થ, સંતુલિત અને સંવેદનશીલ સમાજ રચવા માટે જનઆંદોલન બનાવવાની અપીલ કરી. ગુજરાત રાજ્ય યોગ બોર્ડના યોગ કોચ અને ટ્રેનર્સના પ્રથમ દીક્ષાંત સમારોહના અધ્યક્ષસ્થાનેથી તેમણે જણાવ્યું કે, મનની શાંતિ અને સ્વસ્થ જીવનશૈલી સાથે જ રાષ્ટ્ર નિર્માણનું સપનું સાકાર થઈ શકે.
‘ધ્યાન એકાગ્રતા અને મજબૂત નિર્ણયશક્તિ વિકસાવે છે’ મુખ્યમંત્રીએ જણાવ્યું કે વડાપ્રધાન નરેન્દ્ર મોદી દ્વારા રજૂ કરાયેલ ‘વિકસિત ભારત@2047’ના લક્ષ્યને સિદ્ધ કરવા માટે યોગ અને ધ્યાન મહત્વપૂર્ણ ભૂમિકા ભજવે છે. તેમણે ઉમેર્યું કે યોગ શારીરિક તાકાત વધારશે, જ્યારે ધ્યાન મનની એકાગ્રતા અને મજબૂત નિર્ણયશક્તિ વિકસાવે છે.
આ કાર્યક્રમમાં ગુજરાત રાજ્ય યોગ બોર્ડના કોચ અને ટ્રેનર્સને પ્રમાણપત્રો એનાયત કરવામાં આવ્યા. મુખ્યમંત્રીએ ધ્યાનને ભારતની પ્રાચીન સંસ્કૃતિનું અમૂલ્ય વરદાન ગણાવ્યું અને આજના તણાવભર્યા જીવનમાં માનસિક શાંતિ માટે તેની પ્રાસંગિકતા પર ભાર મૂક્યો.
‘યોગ ભારતના આધ્યાત્મિક વારસાનું ગૌરવ છે’ તેમણે યાદ અપાવ્યું કે યોગને વૈશ્વિક ઓળખ અપાવવાના પરિણામે આજે 21 જૂન વિશ્વ યોગ દિવસ તરીકે ઉજવાય છે, જે ભારતના આધ્યાત્મિક વારસાનું ગૌરવ છે. યોગથી સ્વસ્થ જીવન અને આયુષ્માન ભારત જેવી યોજનાઓ દ્વારા આરોગ્ય સુરક્ષા બંને એકબીજાના પૂરક હોવાનું પણ તેમણે જણાવ્યું.