શ્રી નૂતન કેળવણી મંડળ સંચાલિત શ્રી વી.ડી. કાણકિયા આર્ટ્સ અને શ્રી એમ.આર સંઘવી કોમર્સ કોલેજ, સાવરકુંડલા ખાતે તારીખ ૧૧ જાન્યુઆરી સોમવારના રોજ ઇન્ટર ક્લાસ ક્રિકેટ ટુર્નામેન્ટની ફાઈનલ મેચ યોજાઇ હતી.
આ ટુર્નામેન્ટમાં કોલેજની જુદી જુદી ટીમોએ ભાગ લીધો હતો. અને ટી. વાય. બી. કોમ. અને એફ. વાય. બી.એ.ની ટીમ ફાઇનલમાં પહોંચી હતી. આ તકે સાવરકુંડલા લીલીયા વિસ્તારના લોકલાડીલા ધારાસભ્ય મહેશભાઈ કસવાલાની પ્રેરક ઉપસ્થિતિ રહી હતી. તેમની સાથે અન્ય રાજકીય, સામાજિક આગેવાનો જોડાયા હતા. માનનીય ધારાસભ્યએ ટોસ ઉછાળ્યો અને ટી. વાય. બી. કોમ.ની ટીમ ટોસ જીતી અને બેટિંગ સ્વીકાર્યું હતું.
ત્યારબાદ ખૂબ જ સરસ રીતે રસાકસીભર્યો મેચ આ બે ટીમ વચ્ચે થયો હતો. માનવંતા મહેમાનો, કોલેજ સ્ટાફગણ તેમજ કોલેજના વિદ્યાર્થીઓએ મેચ નિહાળ્યો હતો. નિરવભાઈ બોરીસાગર તથા સુજલભાઈ કનાલાએ અમ્પાયર તરીકેની સેવાઓ આપી હતી. કોલેજના અધ્યાપક હૈદરખાન પઠાણે ખૂબ જ રસતરબોળ એવી લાઈવ કોમેન્ટ્રી કરી અને મેચની લહેજત વધારી હતી.
અંતમાં ટી. વાય બી. કોમ.ની ટીમ વિજેતા જાહેર થઈ અને એફ. વાય. બી. એ.ની ટીમ રનર્સ અપ જાહેર થઈ. તેમને કોલેજના પ્રિન્સિપાલ ડૉ. રવિયા સાહેબ તથા રમતગમત કમિટીના અધ્યક્ષ અર્જુનસિંહ પરમાર દ્વારા શિલ્ડ અર્પણ કરી તેમનું બહુમાન કરવામાં આવ્યું હતું. કોલેજના તમામ અધ્યાપકશ્રીઓ તેમજ નોનટીચિંગ સ્ટાફે જહેમત ઉઠાવી હતી.
બિપીન પાંધી સાવરકુંડલા