મહાશિવરાત્રિ પર્વની સમગ્ર દેશમાં હર્ષોલ્લાસ સાથે ઉજવણી કરવામાં આવે છે, ત્યારે વડોદરાના એક યુવાને આ વર્ષે મહાશિવરાત્રિ પર્વની ઉજવણી પાકિસ્તાનમાં આવેલા પૌરાણિક કટાસરાજ શિવમંદિરમાં ધામધૂમથી કરી હતી અને શિવ ભક્તિમાં લીન થયો હતો. તેમની સાથે ભાવનગરના બે શ્રદ્ધાળુઓ પણ હતા.
પાક.માં મહાશિવરાત્રિની ઉજવણીની ઇચ્છા વ્યક્ત કરી હતી વડોદરાના યુવક પંકજ સિસોદિયાએ જણાવ્યું હતું કે, ગત તા. 26 ફેબ્રુઆરીના રોજ મહાશિવરાત્રિ પર્વની ઉજવણી મારે પાકિસ્તાનમાં આવેલા પ્રાચિન શિવ મંદિર કટાસરાજ ખાતે કરવાની ઇચ્છા હતી. જેથી મેં ભારત સરકાર તરફથી મળતી સુવિધાઓની માહિતી એકત્ર કરવાનું શરૂ કર્યું હતું, ત્યારે મારા એક પરિચિત મારફતે મને આ યાત્રા માટે પાકિસ્તાનના વિઝા સહિતની તમામ સુવિધાઓ અંગે માર્ગદર્શન પુરૂ પાડવામાં આવ્યું હતું.
માહિતી મળતા મેં પાકિસ્તાનના વિઝા મેળવવા માટે જરૂરી દસ્તાવેજો એકત્ર કર્યા અને થોડા દિવસોમાં મારા વિઝા આવી ગયા હતા. ગત તા. 24 ફેબ્રુઆરીથી 2 માર્ચ સુધીના વિઝા આપવામાં આવ્યા હતા. યાત્રામાં મારી સાથે મારા સહિત કુલ 105 યાત્રી હતા. અમારી યાત્રા અમૃતસરથી શરૂ થઈ હતી.
અમે વાઘા અટારી બોર્ડરથી પાકિસ્તાન પહોંચ્યા હતા. સૌથી પહેલાં અમે લાહોરમાં ડેરા સાહેબ ગુરૂદ્વારામાં રોકાણ કર્યું હતું. ત્યાર બાદ પાકિસ્તાનમાં અમારી યાત્રા શરૂ થઈ હતી. પાક.ના રાવલપિંડીમાં આવેલા ચકવાસ ગામમાં કટાસરાજ શિવમંદિર પહોંચીને મહાશિવરાત્રિ પર્વની ખુબ ઉત્સાહ ભેર ઉજવણી કરી હતી. આ યાત્રા દર વર્ષે યોજાય છે.
પાક. આર્મી અને ડેલિગેટ્સે ખૂબ જ સારૂ વર્તન કર્યું હતું હું પાકિસ્તાન પહોંચ્યો ત્યારે મને એક ક્ષણ માટે પણ એવો અહેસાસ થયો નહીં કે, હું એક દુશ્મન દેશમાં છું. કારણ કે, જ્યારે હું ત્યાં પહોંચ્યો ત્યારે વાઘા બોર્ડરથી જ પાકિસ્તાન આર્મી અને ડેલિગેટ્સે ખૂબ જ સારૂ વર્તન કર્યું હતું. આ સાથે વાઘા બોર્ડર પર ભારતીય સેના દ્વારા પણ અમારો જુસ્સો વધારવામાં આવ્યો હતો. પાકિસ્તાનના લોકો પણ ઇચ્છે છે કે, ભારતીય પ્રવાસીઓ આવે અને શિવરાત્રિની ઉજવણી કરે.