વડોદરા જિલ્લાના સાધલી ગામનો તલાટી મહિલા સરપંચને ગેરમાર્ગે દોરી વિવિધ વિકાસ કામો માટે આવેલી રૂપિયા 10.20 લાખની ગ્રાન્ટ ચાંઉ કરી જતાં ચકચાર મચી ગઇ હતી. RTGS દ્વારા પોતાના અંગત એકાઉન્ટમાં જમા કરાવી સરકારી નાણાંની ઉચાપત કરનાર ભેજાબાજ તલાટી સહિત બે સામે જુનિયર તલાટીએ શિનોર પોલીસ મથકમાં ફરિયાદ નોંધાવી છે. પોલીસે ફરિયાદના આધારે છેતરપિંડીનો ગૂનો દાખલ કરી કાર્યવાહી હાથ ધરી છે.
બે સામે સરકારી નાણાની ઉપાચતની ફરિયાદ મળેલી માહિતી પ્રમાણે વડોદરા ખટંબા ખાતે 78, અનંતા શુભલામ સોસાયટીમાં રહેતા અને સાધલી ગામમાં જુનિયર તલાટી તરીકે ફરજ બજાવતા જીતેન્દ્ર માનસિંહભાઈ ડામોરે શિનોર પોલીસ મથકમાં તેઓના સિનીયર તલાટી નિતીન મુકેશભાઇ જેતાણી (રહે. સાધલી, શિનોર) સામે રૂપિયા 10,20,856ની ઉચાપત અને અલ્પેશ ભાઈલાલ પટેલ (રહે. અવાલખ, શિનોર, વડોદરા)ને રૂપિયા 1,44, 500નો ચેક લખી આપી સરકારી નાણાંની ઉચાપત કર્યાની ફરિયાદ નોંધાવી હતી.
તલાટી અને સરપંચની સહીથી લેવડદેવડ થતી ફરિયાદમાં જણાવ્યા પ્રમાણે, સાધલી ગામે ફર્સ્ટ તલાટી કમ મંત્રી તરીકે નિતીન મુકેશભાઈ જેતાણી ફેબ્રુ. 2024થી ફરજ બજાવતા હતા. તેઓ સરકારના નોટિફિકેશન મુજબ ગ્રામ પંચાયતની બેંકોમાં તેમની અને સરપંચની સહીથી લેવડદેવડ થતી હતી. સપ્ટેમ્બર, 2024થી તેઓ નોકરી પર આવતા બંધ થઇ ગયા હતા. જેથી ગામના સરપંચ મનીષાબેન પટેલે લેખિતમાં તાલુકા વિકાસ અધિકારીને જાણ કરી હતી.
વોરંટ ઇશ્યુ કરતા તલાટી ઘરે ન મળ્યો ઉચાપત કર્યા બાદ ભેજાબાજ તલાટી નિતીન જેતાણી 10 દિવસથી ગેરહાજર રહેતા તેમના વિરૂદ્ધ વોરંટ ઇશ્યુ કરીને હાજર રહેવા જણાવાયું હતું. વોરંટ ઇશ્યુ કરતા સમયે તેઓ ઘરે મળી આવ્યા ન હતા અને તેમનો ફોન પણ બંધ આવતો હતો. જેથી સાધલી ગ્રામ પંચાયતનું કામકાજ ખોરવાયું હતું. સાધલી ગ્રામ પંચાયત ત્રણ બેંક એકાઉન્ટ ધરાવે છે, જેના જાન્યુઆરી, 2025ના રોજ રોજમેળ સાથે ત્રણ ખાતાની બેંક સિલક સરખાવતા ઓછી સિલક બતાવતી હતી. જેથી સરપંચ દ્વારા પાસબુક એન્ટ્રી ચેક કરાવવામાં આવી હતી. દરમિયાન નીતીન જેતાણીના એકાઉન્ટમાં રૂ. 10.20 લાખ ટ્રાન્સફર થયા હોવાની એન્ટ્રી માર્ચ, 2024ની બતાવતી હતી. અન્ય એક રૂપિયા 1.44 લાખની એન્ટ્રી અલ્પેશભાઈ ભાઇલાલભાઈ પટેલ (રહે. અવાખલ)ના નામે મળી આવી હતી.
તપાસમાં તલાટીના ખાતામાં 10.20 લાખ મળી આવ્યાં દરમિયાન બેંક સ્ટેટમેન્ટ કઢાવવામાં આવ્યા હતા. જેમાં તાલુકા વિકાસ અધિકારી તરફથી લોકઉપયોગી ગ્રાન્ટ, ડોર ટુ ડોર ગ્રાન્ટ, સ્વચ્છતા હી સેવાની ગ્રાન્ટ, ઓક્ટ્રોયની ગ્રાન્ટ તમામ મળીને રૂપિયા 10.20 લાખ રકમ જમા થઈ હતી. તલાટી નિતીન જેતાણીએ આ રકમ ચાઉં કરી જવા માટે હંગામી કારકુનના મોબાઇલ પરથી સરચંપના પતિને ફોન કરીને જણાવ્યું હતું કે, જે ખાતામાં ગ્રાન્ટ મંજુર થઇને આવેલી છે. તે બેંક એકાઉન્ટ બંધ કરાવવાનું છે. જેથી આપણે તે ગ્રાન્ટ ખાતામાં ન રહી જાય તે માટે અન્ય બેંકમાં ટ્રાન્સફર કરાવી દઇએ. જેથી તલાટીએ આરટીજીએસ દ્વારા પોતાના અંગત બેંક એકાઉન્ટમાં ટ્રાન્સફર કરી લીધા હતા.
બે સામે પોલીસ ફરિયાદ નોંધાઈ આખરે મોટી ગફલેબાજી કરનાર તલાટી કમ મંત્રી નીતીન મુકેશભાઇ જેતાણી (રહે. સાધલી, શિનોર, વડોદરા ગ્રામ્ય) અને તેના સાગરીત અલ્પેશ ભાઇલાલ પટેલ (રહે. અવલખ, શિનોર, વડોદરા ગ્રામ્ય) સામે સરકારી નાણાંની ઉચાપત મામલે ફરિયાદ નોંધવામાં આવી હતી.