પાટણની શ્રી બી.ડી. સાર્વજનિક વિદ્યાલયની વિદ્યાર્થિની ડિનલ વિઠાણીએ આંતરરાષ્ટ્રીય સ્તરે મોટી સફળતા હાંસલ કરી છે. તેણીની FIBA U-16 વિમેન્સ એશિયા કપ 2025 ડિવિઝન બી માટે ભારતીય અન્ડર-16 મહિલા રાષ્ટ્રીય બાસ્કેટબોલ ટીમમાં પસંદગી થઈ છે.
મલેશિયાના સેરેમબાનમાં 13-19 સપ્ટેમ્બર 2025 દરમિયાન યોજાનાર આ ટુર્નામેન્ટમાં ભારતને ગ્રુપ એમાં સ્થાન મળ્યું છે. ભારતીય ટીમે ઈરાન, સમોઆ અને ઉઝબેકિસ્તાન સામે વિજય મેળવી સેમિફાઇનલમાં પ્રવેશ કર્યો છે.
ડિનલે નિલય ચૌહાણના માર્ગદર્શન હેઠળ ડિસ્ટ્રિક્ટ લેવલ સ્પોર્ટ્સ સ્કૂલ (DLSS) પાટણમાં તાલીમ મેળવી છે. તેની મહેનત અને પ્રતિબદ્ધતાના કારણે ટૂંક સમયમાં જ ઇન્ડિયા કેમ્પમાં સ્થાન મેળવ્યું.
DLSS પાટણની સ્થાપનામાં આચાર્ય ડૉ. બળદેવભાઈ દેસાઈ, જિલ્લા રમતગમત વિકાસ અધિકારી નરેશભાઈ ચૌધરી અને કિરણભાઈ પટેલનો મહત્વપૂર્ણ ફાળો રહ્યો છે. શ્રી પાટણ જૈન મંડળના પ્રમુખ દાનેશભાઈ શાહ સહિત સંસ્થાના હોદ્દેદારોએ ડિનલને શુભેચ્છાઓ પાઠવી છે.