રવિવારે (૨૧ ડિસેમ્બર) ભારતે મૈમનસિંઘમાં લઘુમતી સમુદાયના સભ્ય દીપુ ચંદ્ર દાસની “ભયાનક હત્યા” બાદ નવી દિલ્હીમાં બાંગ્લાદેશ હાઈ કમિશનની બહાર થયેલા વિરોધ પ્રદર્શન અંગે બાંગ્લાદેશ મીડિયાના કેટલાક ભાગોમાં ફેલાયેલા ‘ભ્રામક પ્રચાર‘ને ફગાવી દીધો.
મીડિયાના પ્રશ્નોના જવાબમાં, વિદેશ મંત્રાલય ના પ્રવક્તા રણધીર જયસ્વાલે સ્પષ્ટતા કરી કે પ્રદર્શન શાંતિપૂર્ણ, સંક્ષિપ્ત હતું અને તેમાં કોઈ સુરક્ષા ચિંતા નહોતી. તેમણે કહ્યું કે ૨૦ ડિસેમ્બરે લગભગ ૨૦-૨૫ યુવાનોનું એક નાનું જૂથ હાઈ કમિશનની બહાર એકત્ર થયું હતું.
‘ભ્રામક પ્રચાર‘
“અમે આ ઘટના અંગે બાંગ્લાદેશ મીડિયાના કેટલાક ભાગોમાં ભ્રામક પ્રચાર નોંધ્યો છે. હકીકત એ છે કે ૨૦ ડિસેમ્બરે નવી દિલ્હીમાં બાંગ્લાદેશ હાઈ કમિશનની સામે લગભગ ૨૦-૨૫ યુવાનો એકઠા થયા હતા અને મૈમનસિંઘમાં દીપુ ચંદ્ર દાસની ભયાનક હત્યાના વિરોધમાં સૂત્રોચ્ચાર કર્યા હતા, સાથે જ બાંગ્લાદેશમાં તમામ લઘુમતીઓની સુરક્ષા માટે પણ હાકલ કરી હતી,” સ્ઈછ એ એક નિવેદનમાં જણાવ્યું હતું.
“કોઈપણ સમયે વાડ તોડવાનો કે સુરક્ષા પરિસ્થિતિ ઊભી કરવાનો કોઈ પ્રયાસ થયો ન હતો. સ્થળ પર તૈનાત પોલીસે થોડીવાર પછી જૂથને વિખેરી નાખ્યું. આ ઘટનાઓના દ્રશ્ય પુરાવા બધા માટે જાહેરમાં ઉપલબ્ધ છે. ભારત વિયેના સંમેલન અનુસાર તેના ક્ષેત્રમાં વિદેશી મિશન/પોસ્ટની સુરક્ષા સુનિશ્ચિત કરવા માટે પ્રતિબદ્ધ છે,” નિવેદનમાં આગળ ઉમેરવામાં આવ્યું છે.
‘ગુનેગારોને ન્યાયના કઠેડામાં લાવવા માંગે છે‘
એમઈએ પ્રવક્તાએ વધુમાં જણાવ્યું હતું કે ભારત બાંગ્લાદેશમાં વિકસતી પરિસ્થિતિ પર નજીકથી નજર રાખી રહ્યું છે. “અમારા અધિકારીઓ બાંગ્લાદેશના અધિકારીઓ સાથે સંપર્કમાં છે અને લઘુમતીઓ પરના હુમલાઓ અંગે તેમને અમારી મજબૂત ચિંતાઓ વ્યક્ત કરી છે,” તેમણે કહ્યું.
ભારતે ઢાકાને દીપુ ચંદ્ર દાસની હત્યામાં જવાબદારી સુનિશ્ચિત કરવા પણ વિનંતી કરી છે. “અમે વિનંતી કરી છે કે દાસની બર્બર હત્યાના ગુનેગારોને ન્યાયના કઠેડામાં લાવવામાં આવે,” તેમણે ઉમેર્યું.
ઉસ્માન હાદીના મૃત્યુ અને દીપુ ચંદ્ર દાસની મોબ લિંચિંગને લઈને બાંગ્લાદેશમાં ફાટી નીકળેલી વ્યાપક હિંસા વચ્ચે બાંગ્લાદેશ દૂતાવાસની બહાર સુરક્ષા વધારી દેવામાં આવી હતી.
બાંગ્લાદેશમાં અશાંતિ
વિદ્યાર્થી નેતા શરીફ ઉસ્માન હાદીના મૃત્યુ બાદ, આ અઠવાડિયાની શરૂઆતમાં બાંગ્લાદેશમાં મોટા પાયે અશાંતિ ફાટી નીકળી હતી. યુનુસના નેતૃત્વ હેઠળની વચગાળાની સરકારે તેમના મૃત્યુની પુષ્ટિ કર્યા પછી ઢાકા અને આસપાસના વિસ્તારોમાં વિરોધ પ્રદર્શનો ફેલાઈ ગયા હતા.
ઇન્કિલાબ મંચાના પ્રવક્તા ઉસ્માન હાદી ૧૨ ડિસેમ્બરના રોજ ઢાકામાં થયેલા હત્યાના પ્રયાસમાં ગંભીર રીતે ઘાયલ થયા હતા. સિંગાપોરના વિદેશ મંત્રાલયના સત્તાવાર નિવેદન મુજબ, તેમને બાદમાં તબીબી સારવાર માટે સિંગાપોર લઈ જવામાં આવ્યા હતા પરંતુ તેમની ઇજાઓથી તેમનું મૃત્યુ થયું હતું. તેમના મૃત્યુથી વ્યાપક લોકોમાં રોષ ફેલાયો હતો, જેમાં મુહમ્મદ યુનુસે ન્યાયનું વચન આપ્યું હતું અને જવાબદારો માટે “કોઈ દયા નહીં” કરવાની ચેતવણી આપી હતી.
આ અશાંતિ વચ્ચે, ૨૫ વર્ષીય કપડા ફેક્ટરીના કામદાર દીપુ ચંદ્ર દાસને ઈશનિંદાના આરોપમાં ટોળાએ માર માર્યો હતો અને શુક્રવારે તેમના શરીરને આગ ચાંપી દેવામાં આવી હતી. આ હત્યાની ભારતમાં જાેરદાર નિંદા થઈ હતી અને નવી દિલ્હીમાં બાંગ્લાદેશ હાઈ કમિશનની બહાર વિરોધ પ્રદર્શનો થયા હતા.
બાંગ્લાદેશમાં એક હિન્દુ વ્યક્તિની લિંચિંગના સંદર્ભમાં ઓછામાં ઓછા દસ લોકોની ધરપકડ કરવામાં આવી છે, વચગાળાની સરકારના મુખ્ય સલાહકાર મુહમ્મદ યુનુસે શનિવારે જાહેરાત કરી હતી.
યુનુસે X પર આપેલા નિવેદનમાં જણાવ્યું હતું કે, ૧૦ માંથી સાતની રેપિડ એક્શન બટાલિયન દ્વારા ધરપકડ કરવામાં આવી હતી જ્યારે ત્રણને પોલીસે આ કેસમાં શંકાસ્પદ તરીકે ધરપકડ કરી હતી.
પોલીસના જણાવ્યા અનુસાર, દાસને પહેલા ફેક્ટરીની બહાર એક ટોળાએ ઇશનિંદાના આરોપમાં માર માર્યો હતો અને ઝાડ પર લટકાવી દીધો હતો. ત્યારબાદ ભીડે મૃતકના મૃતદેહને ઢાકા-મૈમનસિંહ હાઇવેની બાજુમાં છોડી દીધો હતો અને બાદમાં તેને આગ લગાવી દીધી હતી. પોલીસે મૃતદેહ કબજે કર્યો હતો અને તેને શબપરીક્ષણ માટે મૈમનસિંહ મેડિકલ કોલેજના શબઘરમાં મોકલી આપ્યો હતો.
ગયા વર્ષે ઓગસ્ટમાં તત્કાલીન વડા પ્રધાન શેખ હસીનાને પદભ્રષ્ટ કર્યા પછી બાંગ્લાદેશમાં હિન્દુ વસ્તીએ દેશભરમાં લઘુમતી વિરોધી ઘટનાઓનો સામનો કરવો પડ્યો છે.