રમતગમતમાં સહકાર અને જાેડાણ મારફતે લોકોથી લોકોનાં સંબંધો વધારવા પર ચર્ચાવિચારણા થઈ
ગ્રીન એન્ટિગુઆ અને બાર્બુડાનાં વિદેશી બાબતો, વેપાર અને બાર્બુડા બાબતોનાં મંત્રી મહામહિમ ઇ.પી. ચેટ ભારતનાં પ્રવાસે આવ્યાં હતાં. તેઓ ભારત સરકારનાં કેન્દ્રીય યુવા બાબતો અને રમતગમત તથા શ્રમ અને રોજગાર મંત્રી ડૉ. મનસુખ માંડવિયાને ૨૧.૦૩.૨૦૨૫નાં રોજ શ્રમ શક્તિ ભવન ખાતે તેમની ઓફિસમાં મળ્યાં હતાં.
બંને પક્ષોએ ભારત તથા એન્ટિગુઆ અને બાર્બુડા વચ્ચેનાં ઐતિહાસિક સંબંધો પર પ્રકાશ પાડ્યો હતો. ચર્ચામાં ક્રિકેટ, ફૂટબોલ, રગ્બી, બાસ્કેટબોલ અને વોલીબોલ સહિત વિવિધ રમતોમાં સહકાર માટેના માર્ગો શોધવામાં આવ્યા હતા. એન્ટિગુઆના પ્રતિનિધિ મંડળે બહુપક્ષીય મંચો પર પરસ્પર સમર્થન અને સહયોગના વિસ્તરણમાં રસ દાખવ્યો હતો.
આ સંવાદમાં રમતવીરો અને કોચ માટે આદાનપ્રદાન કાર્યક્રમો, રમત વિજ્ઞાન, ચિકિત્સા, વ્યવસ્થાપન અને માળખાગત વિકાસ જેવા મુખ્ય ક્ષેત્રોને પણ આવરી લેવામાં આવ્યા હતા. સર વિવ રિચાર્ડ્સની ભારતમાં અપાર લોકપ્રિયતાને માન્યતા આપીને એન્ટિગુઆની ટીમે તેમની રાષ્ટ્રીય ટીમને મજબૂત બનાવવાના હેતુથી તેમના દેશમાં ક્રિકેટિંગ સુવિધાઓને અપગ્રેડ કરવા માટે દ્વિપક્ષીય સહાયની માંગ કરી હતી. આ ઉપરાંત યુવા પ્રતિભાઓને માર્ગદર્શન આપવા માટે એન્ટિગુઆ અને બાર્બુડા ક્રિકેટના દિગ્ગજાેને ભારતમાં કોચિંગ એકેડેમીમાં સામેલ કરવા અંગે પણ ચર્ચા-વિચારણા કરવામાં આવી હતી.
મહામહિમ ઇ.પી. ચેટ ગ્રીને માનનીય રમતગમત મંત્રીનો તેમના ભૂતકાળના યોગદાન બદલ આભાર વ્યક્ત કર્યો હતો અને રસી સહાય દ્વારા કોવિડ -૧૯ રોગચાળા દરમિયાન ભારતના સમર્થનને સ્વીકાર્યું હતું. તેમણે ગ્લોબલ સાઉથ, આર્થિક વૃદ્ધિ, હેલ્થકેર અને ડિજિટલ નવીનતાને ચેમ્પિયન બનાવવા માટે માનનીય પ્રધાનમંત્રી નરેન્દ્ર મોદીના સ્વપ્નદ્રષ્ટા નેતૃત્વની પ્રશંસા કરી હતી.
બંને પક્ષોએ રમતગમતમાં સહકાર અને જાેડાણ મારફતે લોકો વચ્ચેનાં સંબંધો વધારવા પર ભાર મૂક્યો હતો.