રાજ્યની રાજધાની પટનામાં થયેલ માર્ગ અકસ્માત અંગે બિહાર પોલીસે જણાવ્યું હતું કે, બુધવાર અને ગુરુવારની રાત્રે પટનાના શ્રીકૃષ્ણ પુરી વિસ્તાર નજીક અટલ પથ પર એક ઝડપી સ્કોપિર્યો એસયુવી પોલીસ પેટ્રોલિંગ ટીમ સાથે અથડાતા સારવાર દરમિયાન એક મહિલા કોન્સ્ટેબલનું મોત થયું હતું અને બે અન્ય પોલીસ કર્મચારીઓ ઘાયલ થયા હતા. શ્રીકૃષ્ણ પુરી પોલીસ સ્ટેશનના અધિકારીઓ અટલ પથ પર નિયમિત વાહન તપાસ કરી રહ્યા હતા ત્યારે આ ઘટના બની હતી.
એક સબ-ઇન્સ્પેક્ટર, એક આસિસ્ટન્ટ સબ-ઇન્સ્પેક્ટર અને એક મહિલા કોન્સ્ટેબલની ટીમ એક કારની તપાસ કરી રહી હતી ત્યારે એક બીજું વાહન – એક સ્કોપિર્યો – ખૂબ જ ઝડપે આવીને ચેકિંગ હેઠળના વાહન સાથે અથડાયું હતું, જેના કારણે ત્રણેય કર્મચારીઓને ગંભીર ઇજાઓ પહોંચી હતી.
પટનાના સિનિયર પોલીસ અધિક્ષક અવકાશ કુમારના જણાવ્યા અનુસાર, ઘાયલ કર્મચારીઓને તાત્કાલિક નજીકની હોસ્પિટલમાં ખસેડવામાં આવ્યા હતા. જોકે, મહિલા કોન્સ્ટેબલનું સારવાર દરમિયાન મોત નીપજ્યું હતું, જ્યારે અન્ય બેની હાલત સ્થિર હોવાનું કહેવાય છે.
સ્કોપિર્યોનો ડ્રાઇવર ઘટનાસ્થળેથી ભાગી જવામાં સફળ રહ્યો હતો, પરંતુ પોલીસે અકસ્માત સમયે વાહનની અંદર રહેલા બે મુસાફરોની ધરપકડ કરી હતી. અધિકારીઓએ ફરાર ડ્રાઇવરને શોધવા માટે શોધખોળ શરૂ કરી છે.
“આ ઘટના ત્યારે બની જ્યારે અમારા અધિકારીઓ વાહન તપાસ માટે ફરજ પર હતા. ઝડપથી આવતી સ્કોપિર્યોએ પાછળથી ટક્કર મારી, જેમાં ત્રણ અધિકારીઓ ઘાયલ થયા. તેમાંથી એક, મહિલા કોન્સ્ટેબલનું હોસ્પિટલમાં મૃત્યુ થયું. અન્ય બે લોકો સારવાર હેઠળ છે, અને અમે કારમાં સવાર બે લોકોને અટકાયતમાં લીધા છે. ડ્રાઇવરને ઓળખવા અને ધરપકડ કરવાનો પ્રયાસ ચાલુ છે,” SSP અવકાશ કુમારે જણાવ્યું.
તપાસ ચાલી રહી છે, અને વાહન જપ્ત કરવામાં આવ્યું છે.