દેશમાં સતત વધી રહેલી મોંઘવારી અને જીવનજરૂરી ચીજવસ્તુઓના ભાવવધારાના વિરોધમાં બોટાદમાં યુવક કોંગ્રેસ દ્વારા ઉગ્ર પ્રદર્શન કરવામાં આવ્યું હતું. ગેસ અને ખાદ્ય તેલના ભાવમાં થયેલા ધરખમ વધારાને પગલે કાર્યકરોએ શહેરના મુખ્ય માર્ગો પર ઉતરી આવી વિરોધ નોંધાવ્યો હતો.
યુવક કોંગ્રેસના કાર્યકરો ગેસના ખાલી સિલિન્ડર અને તેલના ખાલી ડબ્બા સાથે રસ્તા પર ઉતરી આવ્યા હતા. પ્રદર્શનકારીઓએ સરકાર વિરોધી સૂત્રોચ્ચાર કરી મોંઘવારી પર નિયંત્રણ લાવવાની માંગ કરી હતી. કાર્યકરોએ આક્ષેપ કર્યો હતો કે વધતી જતી મોંઘવારીને કારણે સામાન્ય જનતા અને મધ્યમ વર્ગની કમર તૂટી ગઈ છે.
દિનદયાળ ચોકમાં ચક્કાજામ શહેરના ટાવર રોડ પર આવેલા દિનદયાળ ચોક ખાતે કોંગ્રેસના કાર્યકરો રસ્તા પર બેસી જતાં વાહનવ્યવહારના પૈડાં થંભી ગયા હતા. ચક્કાજામના કારણે મુખ્ય માર્ગ પર લાંબો ટ્રાફિક જામ સર્જાયો હતો. આ અંગેની માહિતી આપતા જિલ્લા યુવક કોંગ્રેસ પ્રમુખ સુરેશ પરમારે જણાવ્યું હતું કે, તમામ આવશ્યક ચીજવસ્તુઓના ભાવ બેફામ વધ્યા છે, જેનાથી સામાન્ય માણસ પર આર્થિક બોજ વધ્યો છે.
મુખ્ય માંગણીઓ:
રાંધણ ગેસ અને તેલના ભાવમાં તાત્કાલિક ઘટાડો કરવામાં આવે.
સામાન્ય જનતાને હાલાકી પહોંચાડતી મોંઘવારી પર અંકુશ મૂકવામાં આવે.
આવશ્યક ચીજવસ્તુઓના ભાવવધારાને નિયંત્રિત કરવા નક્કર પગલાં લેવામાં આવે.