પશ્ચિમ એશિયામાં પ્રવર્તી રહેલી યુદ્ધ જેવી ગંભીર પરિસ્થિતિને ધ્યાનમાં રાખીને, ભારતની દરિયાઈ સુરક્ષાને સુદ્રઢ બનાવવા માટે જામનગર મરીન ટાસ્ક ફોર્સ દ્વારા દરિયાઈ સરહદ પર સઘન પેટ્રોલિંગ હાથ ધરવામાં આવ્યું છે. આ પગલું ભવિષ્યના સંકટોને ટાળવા માટે શાંતિ કાળમાં તકેદારી રાખવાના ઉદ્દેશ્ય સાથે લેવાયું છે.
દરિયાઈ વિસ્તારમાં સુરક્ષા વધારાઇ મરીન ટાસ્ક ફોર્સની વિવિધ ટીમો દ્વારા જામનગર જિલ્લાના દરિયાકાંઠાના વિસ્તારોમાં ફૂટ પેટ્રોલિંગ અને બોટ પેટ્રોલિંગ દ્વારા “સઘન કોસ્ટલ પેટ્રોલિંગ”નું આયોજન કરાયું હતું. આમાં નવા-જૂના બેડી બંદર, રોજી બંદર, માધાપર-જોડિયા ભૂંગા વિસ્તાર, ખારા બેરાજા, એરફોર્સ ફાયરિંગ રેન્જ દરિયાઈ વિસ્તાર, તેમજ તમામ સંભવિત લેન્ડિંગ પોઈન્ટ્સ અને ફિશિંગ સેન્ટરોનો સમાવેશ થાય છે.
અવાવરું જગ્યાઓનું ઝીણવટભર્યું ચેકિંગ આ ઓપરેશન દરમિયાન, મરીન કમાન્ડોની અલગ-અલગ ટીમોએ દરિયાકાંઠાની અવાવરું જગ્યાઓનું ઝીણવટભર્યું ચેકિંગ કર્યું હતું. ઉપરાંત, દરિયામાં રહેલી શંકાસ્પદ બોટ અને શંકાસ્પદ વ્યક્તિઓની પૂછપરછ તથા તપાસ હાથ ધરીને સુરક્ષા વ્યવસ્થા વધુ કડક બનાવવામાં આવી હતી.
મરીન કમાન્ડોએ ઓપરેશનને સફળ બનાવ્યું આ સમગ્ર સુરક્ષા કવાયત ATS અને કોસ્ટલ સિક્યુરિટીના અધિક પોલીસ મહાનિર્દેશક અમિતકુમાર વિશ્વકર્મા, મરીન ટાસ્ક ફોર્સના આઈ.જી. પી. એલ. માલ અને મરીન ટાસ્ક ફોર્સ હજીરાના એસ.પી. એસ.જે. પરમારના સીધા માર્ગદર્શન હેઠળ હાથ ધરવામાં આવી હતી. જામનગર સેક્ટરના પોલીસ ઇન્સ્પેક્ટર ડી. આર. યાદવ અને તમામ મરીન કમાન્ડોએ આ ઓપરેશનને સફળ બનાવ્યું હતું.
તકેદારી સૌથી વધુ અસરકારક સાબિત થાય મરીન ટાસ્ક ફોર્સના જણાવ્યા અનુસાર, “કોઈપણ કટોકટીપૂર્ણ સમયગાળામાંથી પસાર ન થવું પડે તે માટે સામાન્ય પરિસ્થિતિ દરમિયાન રાખવામાં આવતી તકેદારી સૌથી વધુ અસરકારક સાબિત થાય છે.” આ નિવેદન શાંતિ કાળમાં સુરક્ષાના મહત્વ પર ભાર મૂકે છે.