ઉનાના સીમર ગામે આયોજિત કોળી સમાજના સમૂહ લગ્નોત્સવમાં રાજ્યમંત્રી પરસોતમ સોલંકીએ પોતાના આગવા અંદાજમાં આક્રમક નિવેદન આપતા રાજકીય ગરમાવો આવી ગયો છે. સોલંકીએ સમાજના લોકોને હિંમત આપતા સ્પષ્ટ શબ્દોમાં જણાવ્યું હતું કે, જાે સમાજના લોકો પર કોઈ આફત આવશે કે કોઈ તેમને ડરાવવાની કોશિશ કરશે, તો તેઓ ખડતલ રીતે તેમની પડખે ઊભા રહેશે. જાહેર મંચ પરથી ‘ધોકા મારવા‘ જેવી વાતનો ઉલ્લેખ કરતા કહ્યું કે, અન્ય લોકો તેમના પદની ગરિમા વિશે ભલે ગમે તે ચર્ચા કરે, પરંતુ તેઓ સૌ પ્રથમ કોળી સમાજના દીકરા છે અને અન્યાય સામે લડવું તે તેમનો સ્વભાવ છે.
આ નિવેદન પાછળ પરસોતમ સોલંકીની વર્ષોથી ચાલી આવતી ‘લોકનેતા‘ની છબી જવાબદાર માનવામાં આવે છે. સૌરાષ્ટ્રના દરિયાકાંઠાના વિસ્તારોમાં કોળી સમાજ પર તેમનું પ્રભુત્વ નિર્વિવાદ છે. અગાઉ પણ અનેક વખત તેઓ વહીવટી તંત્ર કે વિરોધીઓ સામે પોતાના સમાજના હિત માટે આકરા વલણ અપનાવી ચૂક્યા છે. આ પ્રસંગે તેમણે વધુમાં ઉમેર્યું કે, જ્યારે સમાજની બહેનો કે ભાઈઓ પર અત્યાચાર થાય ત્યારે ઘણા લોકો માત્ર વાતો કરે છે, જ્યારે તેઓ સીધા મેદાનમાં ઉતરીને ન્યાય અપાવવા માટે જાણીતા છે.
રાજકીય વિશ્લેષકોના મતે, મંત્રીનું આ નિવેદન આગામી સ્થાનિક સ્વરાજ્યની ચૂંટણીઓ પૂર્વે પોતાના મજબૂત જનાધારને એકજૂથ રાખવાનો એક પ્રયાસ હોઈ શકે છે. સોલંકીએ પોતાની બોલવાની મર્યાદાઓનો સ્વીકાર કરતા છતાં એ વાત પર ભાર મૂક્યો હતો કે અન્યાય જાેઈને તેમનાથી મૌન રહી શકાતું નથી. આ કાર્યક્રમમાં સ્થાનિક અગ્રણીઓ અને મોટી સંખ્યામાં સમાજના લોકો ઉપસ્થિત રહ્યા હતા, જેમની વચ્ચે મંત્રીએ પોતાની પરંપરાગત શૈલીમાં સુરક્ષાનો ભરોસો આપ્યો હતો.