ચોટીલાની સત્યજીવન હોસ્પિટલનું સોનોગ્રાફી રજીસ્ટ્રેશન કાયમી રદ

ચોટીલાના નાયબ કલેકટર અને સબ ડિવિઝનલ મેજિસ્ટ્રેટ એચ.ટી. મકવાણાએ ચોટીલા શહેરમાં આવેલી સત્યજીવન સાર્વજનિક હોસ્પિટલના સોનોગ્રાફી મશીનનો નોંધણી પરવાનો કાયમી ધોરણે રદ કરવાનો આદેશ કર્યો છે. આ ઉપરાંત, હોસ્પિટલના બંને સંચાલકો તેમજ બંને ડોકટરો વિરુદ્ધ ચીફ જ્યુડિશિયલ મેજિસ્ટ્રેટ ફર્સ્ટ ક્લાસ (JMFC) ચોટીલાની કોર્ટમાં કમ્પ્લેન કેસ (CC) દાખલ કરવા માટે મામલતદાર ચોટીલાને અધિકૃત કરવામાં આવ્યા છે.

આ કાર્યવાહી ૧૫ સપ્ટેમ્બર, ૨૦૨૫ના રોજ નાયબ કલેકટર એચ.ટી. મકવાણા દ્વારા Pre-Conception and Pre-Natal Diagnostic Techniques (PCPNDT) Act 1994ની કલમ ૩૦ અને આરોગ્ય અને પરિવાર કલ્યાણ વિભાગના નોટિફિકેશન ક્રમાંક GP-15-PNDT-102011-933.B-1થી મળેલ સત્તાની રૂએ કરવામાં આવેલી આકસ્મિક તપાસને પગલે કરવામાં આવી હતી. તપાસ દરમિયાન હોસ્પિટલમાં અનેક ગેરરીતિઓ સામે આવતા સોનોગ્રાફી મશીન સીલ કરવામાં આવ્યું હતું.