સંયુક્ત રાષ્ટ્રના આગામી મહાસચિવ માટે પસંદગી પ્રક્રિયા શરૂ થઈ ગઈ છે, જેમાં આ મહિનાના અંતમાં ચાર ઉમેદવારો ઇન્ટરેક્ટિવ સંવાદોમાં ભાગ લેશે. આ સત્રો ૨૧ અને ૨૨ એપ્રિલે યુએન મુખ્યાલય ખાતે યોજાવાના છે.
હાલના યુએન મહાસચિવ એન્ટોનિયો ગુટેરેસ ડિસેમ્બર ૨૦૨૬ માં તેમનો બીજાે કાર્યકાળ પૂર્ણ કરશે. પોર્ટુગલના ભૂતપૂર્વ વડા પ્રધાન અને એક સમયે શરણાર્થીઓ માટે સંયુક્ત રાષ્ટ્રના ઉચ્ચ કમિશનર ગુટેરેસે ૨૦૧૭ માં પદ સંભાળ્યું હતું. ૮૦ વર્ષ પહેલાં સંયુક્ત રાષ્ટ્રની સ્થાપના થઈ ત્યારથી, કોઈ મહિલાએ ક્યારેય સંગઠનનું નેતૃત્વ કર્યું નથી.
ટોચના પદ માટે નામાંકિત ચાર ઉમેદવારોમાં બે મહિલાઓ છે. તેઓ મિશેલ બેચેલેટ અને રેબેકા ગ્રીન્સપાન છે.
ચિલીના ભૂતપૂર્વ રાષ્ટ્રપતિ અને માનવ અધિકારો માટે સંયુક્ત રાષ્ટ્રના ભૂતપૂર્વ ઉચ્ચ કમિશનર બેચેલેટને બ્રાઝિલ અને મેક્સિકો દ્વારા નામાંકિત કરવામાં આવ્યા છે. યુનાઈટેડ નેશન્સ કોન્ફરન્સ ઓન ટ્રેડ એન્ડ ડેવલપમેન્ટ ના મહાસચિવ અને કોસ્ટા રિકાના ભૂતપૂર્વ ઉપરાષ્ટ્રપતિ ગ્રીન્સપાનને કોસ્ટા રિકા દ્વારા નામાંકિત કરવામાં આવ્યા હતા.
બે પુરુષ ઉમેદવારો રાફેલ ગ્રોસી અને મેકી સેલ છે.
આંતરરાષ્ટ્રીય અણુ ઊર્જા એજન્સીના ડિરેક્ટર જનરલ ગ્રોસીને આજેર્ન્ટિના દ્વારા નામાંકિત કરવામાં આવ્યા છે. સેનેગલના ભૂતપૂર્વ રાષ્ટ્રપતિ સૈલને બુરુન્ડી દ્વારા નામાંકિત કરવામાં આવ્યા હતા.
યુએન જનરલ એસેમ્બલીના પ્રમુખ અન્નાલેના બેરબોકના કાર્યાલયે જણાવ્યું હતું કે દરેક ઉમેદવાર સભ્ય દેશો સાથે ત્રણ કલાકની વાતચીતમાં ભાગ લેશે.
યુએનના નિયમો હેઠળ, સેક્રેટરી જનરલની નિમણૂક સુરક્ષા પરિષદની ભલામણના આધારે ૧૯૩ સભ્યોની જનરલ એસેમ્બલી દ્વારા કરવામાં આવે છે. સુરક્ષા પરિષદ ૧૫ દેશોનો સમૂહ છે, જેમાં પાંચ કાયમી સભ્યો – ચીન, ફ્રાન્સ, રશિયા, યુકે અને યુએસ – દરેક પાસે વીટો પાવર છે.
યુએનજીએના મુખ્ય પદ માટે મહિલાઓને દબાણ કરવાના ઠરાવમાં
ગયા વર્ષે સપ્ટેમ્બરમાં અપનાવવામાં આવેલા યુએન જનરલ એસેમ્બલીના ઠરાવમાં “અફસોસ સાથે” નોંધવામાં આવ્યું હતું કે કોઈ મહિલાએ ક્યારેય સેક્રેટરી જનરલનું પદ સંભાળ્યું નથી. ઠરાવમાં દેશોને આ ભૂમિકા માટે “મહિલાઓને ઉમેદવાર તરીકે નામાંકિત કરવા પર ભારપૂર્વક વિચાર કરવા” વિનંતી કરવામાં આવી હતી.
ઘણા અધિકાર જૂથો અને કાર્યકરો આગામી યુએન વડા એક મહિલા હોય તે માટે દબાણ કરી રહ્યા છે. તેમનો દલીલ છે કે આવી નિમણૂક લિંગ સમાનતાને મજબૂત બનાવવામાં અને સંગઠનમાં વિશ્વાસ પુન:સ્થાપિત કરવામાં મદદ કરશે.