દેવભૂમિ દ્વારકા જિલ્લામાં આગામી દિવસોમાં યોજાનારી ધોરણ 10 અને 12ની બોર્ડની પરીક્ષાનાં સુચારૂ આયોજનનાં અંગે જિલ્લા કલેક્ટર જી.ટી.પંડ્યાના અધ્યક્ષસ્થાને અહીંની કલેક્ટર કચેરીના સભાખંડ ખાતે જિલ્લાના કેન્દ્ર સંચાલકો સાથે બેઠક યોજાઈ હતી.
આગામી સમયમાં યોજાનારી બોર્ડની આ પરીક્ષાઓમાં જિલ્લાના વિદ્યાર્થીઓને કોઈ અગવડતા ન પડે તેમજ સમયસર પરીક્ષા કેન્દ્રો પર વિદ્યાર્થીઓ પહોંચી જાય તે અંગે આયોજન કરવા તેમજ પરીક્ષા કેન્દ્રો પર તમામ સીસીટીવી કેમેરાની ચકાસણી, પીવાના પાણીની વ્યવસ્થા, સ્વચ્છતા તથા જરૂરી તમામ આનુષાંગિક વ્યવસ્થાઓ સુનિશ્ચિત કરવા જિલ્લા કલેક્ટર જી.ટી. પંડ્યા દ્વારા જરૂરી સૂચનો કરવામાં આવ્યા હતા.
આ ઉપરાંત એસટી વિભાગ દ્વારા તમામ રૂટ પર પરીક્ષાર્થીઓ સમયસર પરીક્ષા કેન્દ્રો પર પહોંચી શકે તે અંગે વ્યવસ્થા તેમજ પીજીવીસીએલ વિભાગ દ્વારા જિલ્લાના તમામ પરીક્ષા કેન્દ્રો પર અવિરત વીજ પુરવઠો કાર્યરત રહે તે સુનિશ્ચિત કરવા જણાવ્યું હતું.
આ બેઠકમાં જિલ્લા વિકાસ અધિકારી એસ.ડી. ધાનાણી, નિવાસી અધિક કલેક્ટર ભૂપેશ જોટાણીયા સહિત સંબંધિત વિભાગના અધિકારીઓ તેમજ કેન્દ્ર સંચાલકો ઉપસ્થિત રહ્યા હતા.