જ્યોતિ મલ્હોત્રા બાદ પંજાબમાં વધુ એક યુટ્યુબરની ધરપકડ
પંજાબ પોલીસે બુધવારે ૧.૧ મિલિયનથી વધુ સબ્સ્ક્રાઇબર્સ ધરાવતા યુટ્યુબર જસબીર સિંહની પાકિસ્તાન સમર્થિત જાસૂસી નેટવર્કનો ભાગ હોવાના આરોપસર ધરપકડ કરી હતી. આ ધરપકડ એ વિસ્તૃત તપાસનો એક ભાગ છે જેમાં અગાઉ હરિયાણા સ્થિત પ્રભાવશાળી જ્યોતિ મલ્હોત્રાને સમાન આરોપોમાં ધરપકડ કરવામાં આવી હતી.
રૂપનગર જિલ્લાના મહલાન ગામના રહેવાસી અને યુટ્યુબ ચેનલ જાન મહલ ચલાવતા સિંહ, અનેક પાકિસ્તાની ગુપ્તચર ઓપરેટિવ્સ ના સંપર્કમાં હોવાનું કહેવાય છે, જેમાં શાકિર ઉર્ફે જટ્ટ રંધાવા અને એહસાન-ઉર-રહીમ ઉર્ફે દાનિશનો સમાવેશ થાય છે, જે પાકિસ્તાન હાઈ કમિશનના ભૂતપૂર્વ અધિકારી હતા, જેમને ૧૩ મેના રોજ ભારત દ્વારા હાંકી કાઢવામાં આવ્યા હતા.
પંજાબના પોલીસ મહાનિર્દેશક (ડીજીપી) ગૌરવ યાદવે ઠ પર એક પોસ્ટમાં જણાવ્યું હતું કે સિંહ “આતંકવાદી સમર્થિત જાસૂસી નેટવર્ક” માં એક મુખ્ય કડી હતા. તપાસમાં જાણવા મળ્યું છે કે સિંહે દાનિશના આમંત્રણ પર દિલ્હીમાં પાકિસ્તાન રાષ્ટ્રીય દિવસની ઉજવણીમાં હાજરી આપી હતી, જ્યાં તે કથિત રીતે પાકિસ્તાની સૈન્ય અધિકારીઓ અને વ્લોગર્સને મળ્યો હતો.
“તેમણે ૨૦૨૦, ૨૦૨૧ અને ૨૦૨૪ માં ત્રણ વખત પાકિસ્તાનનો પ્રવાસ કર્યો હતો અને તેમના ઇલેક્ટ્રોનિક ઉપકરણોની ફોરેન્સિક તપાસમાં ઘણા પાકિસ્તાન સ્થિત સંપર્કો મળી આવ્યા છે,” ડીજીપી યાદવે જણાવ્યું હતું.
સિંહે હિસારના વતની અને ટ્રાવેલ વિથ જાે યુટ્યુબ ચેનલના સંચાલક ૩૩ વર્ષીય મલ્હોત્રા સાથે પણ નિયમિત સંપર્ક જાળવી રાખ્યો હતો, જેની ગયા મહિને હરિયાણા પોલીસે કથિત જાસૂસી માટે ધરપકડ કરી હતી. તેની ધરપકડ પછી, સિંહે પાકિસ્તાની ઓપરેટિવ્સ સાથેના તેમના સંદેશાવ્યવહારના રેકોર્ડ કાઢી નાખવાનો પ્રયાસ કર્યો હોવાના અહેવાલ છે.
મોહાલીમાં સ્ટેટ સ્પેશિયલ ઓપરેશન સેલમાં એફઆઈઆર નોંધવામાં આવી છે. પોલીસે જણાવ્યું હતું કે વ્યાપક જાસૂસી અને આતંકવાદી નેટવર્કને ઉજાગર કરવા અને વધારાના સહયોગીઓને ઓળખવા માટે પ્રયાસો ચાલુ છે.
૨૨ એપ્રિલના રોજ પહેલગામમાં થયેલા આતંકવાદી હુમલા અને ત્યારબાદ ભારત અને પાકિસ્તાન વચ્ચે ચાર દિવસ સુધી ચાલેલા લશ્કરી તણાવને પગલે સુરક્ષા પગલાં કડક બનાવાયા છે, જેમાં ૨૬ લોકો માર્યા ગયા હતા.