પશ્ચિમ રેલવે દ્વારા મુંબઈ ઉપનગરીય વિસ્તારમાં છઠ્ઠી રેલવે લાઇનના કમિશનિંગ માટે મહત્વપૂર્ણ ટ્રાફિક અને પાવર બ્લોક લેવામાં આવી રહ્યો છે. આ કામગીરીના કારણે ભાવનગર રેલવે મંડળ હેઠળ આવતી કેટલીક મેલ અને એક્સપ્રેસ ટ્રેનોના સમયપત્રકમાં અસ્થાયી ફેરફાર કરવામાં આવ્યો છે.
રેલવેની આવાગમન સંરચનાને વધુ મજબૂત બનાવવા અને ભવિષ્યમાં ટ્રેનોનું સંચાલન વધુ સુચારુ તથા સમયબદ્ધ બને તે હેતુથી આ કામગીરી હાથ ધરવામાં આવી છે. ભાવનગર રેલવે મંડળના વરિષ્ઠ મંડળ વાણિજ્ય પ્રબંધક શ્રી અતુલ કુમાર ત્રિપાઠીએ આ અંગે માહિતી આપી હતી.
ટ્રેન નંબર 19218 વેરાવળ-બાંદ્રા એક્સપ્રેસ (વેરાવળથી બાંદ્રા) 27 ડિસેમ્બર, 2025ના રોજ 1 કલાક મોડી રવાના થશે. 10 જાન્યુઆરી, 2026ના રોજ 45 મિનિટ અને 15 જાન્યુઆરી, 2026ના રોજ પણ 45 મિનિટ મોડી રવાના થશે. 16 જાન્યુઆરી, 2026ના રોજ તે 30 મિનિટ મોડી ઉપડશે.
આ ઉપરાંત, 6, 7, 13 અને 14 જાન્યુઆરી, 2026ના રોજ આ ટ્રેન માર્ગમાં 15-20 મિનિટ મોડી પડશે. ટ્રેન નંબર 12972 ભાવનગર-બાંદ્રા સુપરફાસ્ટ 27 ડિસેમ્બર, 2025ના રોજ માર્ગમાં 45 મિનિટ મોડી રહેશે. ટ્રેન નંબર 09208 ભાવનગર-બાંદ્રા TOD સ્પેશિયલ 15 જાન્યુઆરી, 2026ના રોજ માર્ગમાં 20 મિનિટ મોડી ચાલશે.
યાત્રીઓને વિનંતી કરવામાં આવે છે કે મુસાફરી કરતા પહેલા NTES એપ, રેલવે પૂછપરછ નંબર 139 અથવા અધિકૃત રેલવે વેબસાઇટ દ્વારા પોતાની ટ્રેનની વર્તમાન સ્થિતિ ચોક્કસપણે તપાસી લે. આરક્ષિત મુસાફરોને SMS એલર્ટ દ્વારા પણ જાણકારી આપવામાં આવી રહી છે.