જર્મનીના બર્લિનમાં નવા વર્ષની ઉજવણી દરમિયાન આગ લાગતી ઇમારત પરથી કૂદીને તેલંગાણાના ૨૫ વર્ષીય ભારતીય વિદ્યાર્થીનું મોત થયું હતું. મૃતકની ઓળખ થોકલા હૃતિક રેડ્ડી તરીકે થઈ છે, જે યુનિવર્સિટી ઓફ યુરોપ ફોર એપ્લાઇડ સાયન્સમાં એમએસ કરી રહ્યા હતા.
મીડિયા રિપોર્ટ્સ અનુસાર, બુધવારે રાત્રે નવા વર્ષની ઉજવણી દરમિયાન તેમના નિવાસસ્થાને આગ લાગી હતી. આગ અને ધુમાડામાં ફસાઈ ગયા બાદ પોતાનો જીવ બચાવવા માટે, રેડ્ડીએ તેમના નિવાસસ્થાનની ટોચ પરથી કૂદીને માથામાં ગંભીર ઈજાઓ પહોંચી હતી. તેમને સ્થાનિક હોસ્પિટલમાં લઈ જવામાં આવ્યા હતા, જ્યાં તેમનું મોત નીપજ્યું હતું.
જંગાવ જિલ્લાના મલકાપુર ગામના રહેવાસી રેડ્ડીએ તેલંગાણાના હનમકોંડા જિલ્લાની એક ખાનગી કોલેજમાંથી બીટેક પૂર્ણ કર્યું હતું. જૂન ૨૦૨૩ માં, તેઓ એમએસ ડિગ્રી માટે જર્મનીના મેગ્ડેબર્ગ ગયા.
પરિવાર વિદેશ મંત્રાલયના સંપર્કમાં છે
આ ઘટનાએ તેમના પરિવારને શોકમાં મૂકી દીધો છે. અહેવાલો મુજબ, રેડ્ડીએ દશેરા દરમિયાન ભારત પરત ફરવાનું મુલતવી રાખ્યું હતું અને તેના બદલે, તેઓ જાન્યુઆરીના બીજા અઠવાડિયામાં સંક્રાંતિ માટે આવવાનું આયોજન કરી રહ્યા હતા. તેમણે હવે તેમના પાર્થિવ શરીરને ભારત પરત લાવવા માટે વિદેશ મંત્રાલય (સ્ઈછ)નો સંપર્ક કર્યો છે.
દરમિયાન, જર્મન અધિકારીઓ આગનું કારણ શોધવા માટે તપાસ કરી રહ્યા છે.
યુએસમાં આગમાં તેલંગાણાની વિદ્યાર્થીનીનું મૃત્યુ
આ ઘટના તેલંગાણાની સહજા રેડ્ડી ઉદુમાલા તરીકે ઓળખાતી બીજી વિદ્યાર્થીની, જેનું યુનાઇટેડ સ્ટેટ્સ (યુએસ)માં તેના ઘરમાં આગ લાગવાથી મૃત્યુ થયું તેના એક મહિના પછી બની છે. તેલંગાણાના જંગાવ જિલ્લાની ઉદુમાલા, ન્યૂ યોર્કના અલ્બેનીમાં રહેતી હતી, જ્યાં તે ઉચ્ચ અભ્યાસ માટે ગઈ હતી.
આ ઘટના ૪ ડિસેમ્બરના રોજ બની હતી, જ્યારે ઉદુમાલાના ઘરે તે સૂતી હતી ત્યારે આગ લાગી હતી, જેના પરિણામે તેનું મૃત્યુ થયું હતું. પોલીસના જણાવ્યા અનુસાર, ૨૪ વર્ષીય યુવતીને તેના શરીરનો ૯૦ ટકા ભાગ બળી ગયો હતો.