જૂનાગઢ જિલ્લાના વંથલી ખાતે 4 કરોડ રૂપિયાના ખર્ચે નવું સામૂહિક આરોગ્ય કેન્દ્ર કાર્યરત કરવામાં આવ્યું છે. વંથલીના દિલાવર નગર વિસ્તારમાં જૂના સામૂહિક આરોગ્ય કેન્દ્રની જગ્યાએ આ અદ્યતન સુવિધા ઊભી કરવામાં આવી છે. આનાથી વંથલી તાલુકાના 47 ગામોના લોકોને સારી અને સગવડભરી સારવાર મળી શકશે.
નવી બનેલી આ હોસ્પિટલમાં ગ્રાઉન્ડ અને ફર્સ્ટ ફ્લોરમાં 30 બેડનો મેલ અને ફિમેલ વોર્ડ બનાવવામાં આવ્યો છે. આ ઉપરાંત, અહીં અદ્યતન લેબોરેટરી, લિફ્ટ, ફિઝિયોથેરાપી, દાંત અને આંખના વિભાગો જેવી સુવિધાઓ પણ ઉપલબ્ધ કરાવવામાં આવી છે.
થોડા સમય અગાઉ વંથલીના આગેવાનો દ્વારા હોસ્પિટલને જૂની જગ્યાએ જ રાખવા માટે આવેદનપત્ર આપવામાં આવ્યું હતું. જોકે, તે સમયે વંથલી નગરપાલિકા પાસે હોસ્પિટલની જરૂરિયાત મુજબ પૂરતી જગ્યા ન હોવાથી, દિલાવરનગર પાસે આવેલી અન્ય સરકારી કચેરીઓ નજીક આ નવી હોસ્પિટલનું નિર્માણ કરવામાં આવ્યું છે.
હોસ્પિટલના અધિક્ષક ડો. સિકંદર પરમાર, ડો. પીઠીયા, ડો. મારુ, ડો. જેઠવા અને સમગ્ર સ્ટાફ દ્વારા પ્રશંસનીય કામગીરી કરવામાં આવી રહી છે. તેમની કામગીરીના પરિણામે, ટીબીની કામગીરીમાં જૂનાગઢ જિલ્લામાં આ કેન્દ્ર પ્રથમ નંબરે રહ્યું છે અને PMJY (પ્રધાનમંત્રી જન આરોગ્ય યોજના) માં પણ ઉત્તમ કામગીરી કરી છે. તાલુકાના લોકોએ તેમની આ કામગીરીને બિરદાવી છે.