વાવ તાલુકા ખાતે જિલ્લા પોલીસ વડાના અધ્યક્ષ સ્થાને એક લોક સંવાદ કાર્યક્રમનું આયોજન કરવામાં આવ્યું હતું. આ કાર્યક્રમમાં સ્થાનિક નાગરિકો મોટી સંખ્યામાં ઉપસ્થિત રહ્યા હતા અને તેમણે પોતાના વિવિધ પ્રશ્નો અંગે ખુલ્લી ચર્ચા કરી હતી.
કાર્યક્રમ દરમિયાન લોકો દ્વારા કાયદો અને વ્યવસ્થાની સ્થિતિ, ટ્રાફિકની સમસ્યાઓ, નશાબંધીના અમલ, ચોરી-લૂંટ જેવી ગુનાહિત ઘટનાઓ તેમજ ગ્રામ્ય વિસ્તારોમાં સુરક્ષા વધારવા બાબતે રજૂઆતો કરવામાં આવી હતી.જિલ્લા પોલીસ વડાએ પ્રજાની તમામ સમસ્યાઓ ધ્યાનપૂર્વક સાંભળી હતી. તેમણે આ પ્રશ્નોના નિરાકરણ માટે યોગ્ય અને તાત્કાલિક કાર્યવાહી કરવાની ખાતરી આપી હતી.
આ લોક સંવાદ કાર્યક્રમમાં તાલુકાના વિવિધ ગામોના સરપંચો પણ ઉપસ્થિત રહ્યા હતા. સરપંચોએ પોતાના ગામોની વિશિષ્ટ સમસ્યાઓ અને સુરક્ષા સંબંધિત મુદ્દાઓ રજૂ કર્યા હતા. તેમણે પોલીસ તંત્ર સાથે સંકલન વધારવા પર ભાર મૂક્યો હતો.આ લોક સંવાદ કાર્યક્રમનો મુખ્ય હેતુ પોલીસ અને પ્રજા વચ્ચેનો વિશ્વાસ વધારવાનો તથા સંવાદ દ્વારા સમસ્યાઓનો સમયસર ઉકેલ લાવવાનો હતો. આ કાર્યક્રમ શાંતિપૂર્ણ માહોલમાં સફળતાપૂર્વક સંપન્ન થયો હતો.