વડોદરા શહેર નજીક આવેલા બાજવા–કરચિયા રોડ પરની રાજેસ્થાન કોલોનીમાં ગત મોડી રાત્રે એક ચાના ગલ્લામાં ભેદી સંજોગોમાં ભીષણ આગ ફાટી નીકળી હતી. આગની ચપેટમાં આવી જતાં ગલ્લામાં રાખેલો ૫ કિલોગ્રામનો નાનો એલપીજી સિલિન્ડર પ્રચંડ ધડાકા સાથે બ્લાસ્ટ થયો હતો.
આ બ્લાસ્ટ એટલો તીવ્ર હતો કે આખો ગલ્લો તૂટીને વિખેરાઈ ગયો હતો અને તેના કુરચેકુરચા ઊડી ગયા હતા. ધડાકાના અવાજથી સમગ્ર વિસ્તારમાં ભયનો માહોલ સર્જાયો હતો. ઘટનાની જાણ થતાં જ ફાયર બ્રિગેડની ટીપી-૧૩ની ટીમ તાત્કાલિક સ્થળ પર પહોંચી હતી અને ભારે જહેમત બાદ આગ પર કાબૂ મેળવ્યો હતો. સદનસીબે આ દુર્ઘટનામાં કોઈ જાનહાનિ થઈ નહોતી.
દરવાજે કંકુ-ચોખાની પોટલી મૂકી ગલ્લાને આગ ચાંપવામાં આવી આ રહસ્યમય ઘટના આકસ્મિક ન હોવાનો અને કોઈ અજાણ્યા શખ્સે જાણીજોઈને અંજામ આપ્યો હોવાનો આક્ષેપ પરિવારે કર્યો છે. ઘટના પૂર્વે એક શંકાસ્પદ યુવક આ કોલોનીમાં પ્રવેશતો જોવા મળ્યો હતો, જેના હાથમાં એક પોટલી હતી.
આ પોટલીમાં કંકુ, ચોખા અને ઘઉં જેવી સામગ્રી હોવાનું અને તે પરિવારના ઘરના મુખ્ય બારણા પાસે મૂકવામાં આવી હોવાનું સામે આવ્યું છે. આ અંધશ્રદ્ધા જેવી શંકાસ્પદ પ્રવૃત્તિ બાદ ગલ્લામાં આગ લગાવી દેવામાં આવી હોવાની આશંકા પરિવારજનોએ વ્યક્ત કરી સમગ્ર મામલે સ્થાનિક પોલીસને જાણ કરી છે.