નવી દિલ્હી
પ્રિયંકા ગાંધીએ ઉત્તર પ્રદેશ પોલીસ સમક્ષ પ્રશ્ન કર્યો હતો કે, તેમને પોલીસના વાહનમાં કેમ લઈ જવામાં આવી રહ્યા છે? પોલીસ દ્વારા કરવામાં આવેલી મૂઠભેઢ પર પ્રિયંકા ગાંધીએ કહ્યું કે આ અપહરણ, છેડતી અને મારપીટનો કેસ બની શકે છે. તેમણે કહ્યું કે, જાઓ તમારા પોલીસ ઓફિસર્સ અને મંત્રીઓ પાસેથી વોરંટ અથવા ઓર્ડર લઈને આવો. હું પણ કાયદો સમજુ છું. ઉત્તર પ્રદેશમાં ભલે કાયદાનું પાલન ના થતું હોય, પરંતુ દેશમાં કાયદો છે. પ્રિયંકા ગાંધીએ આ ઘટના પર ભારતીય જનતા પાર્ટી પર નિશાન સાધ્યું છે. તેમણે ટિ્વટ કરીને લખ્યું કે, ભારતા જનતા પાર્ટી દેશના ખેડૂતોને આટલી નફરત કરે છે? તેમને જીવવાનો હક છે કે નહીં? જાે તે અવાજ ઉઠાવશે તો ગોળી મારી દેશે, ગાડી ચઢાવી દેશે? આ ખેડૂતોનો દેશ છે, ભારતીય જનતા પાર્ટીની ક્રૂર વિચારધારાની જાગીર નથી. લખીમપુર ખીરીમાં ખેડૂતોના મૃત્યુ પછી રાજકારણ ગરમાયુ છે. અહીં વિરોધ કરી રહેલા પ્રદર્શનકારીઓ પર બે એસયુવી કાર ફરી વળી હતી. ઘટનામાં અનેક ખેડૂતો ઈજાગ્રસ્ત થયા હતા. ખેડૂત નેતાએ આરોપ મૂક્યો છે કે, કેન્દ્રીય રાજ્યમંત્રી અજય કુમાર મિશ્રાનો પુત્ર એસયુવીમાં હતો. આ ઘટના પછી વિવિધ રાજકીય પાર્ટીઓના નેતાઓ લખીમપુર ખીરી જવા નીકળી રહ્યા છે, પરંતુ પોલીસ દ્વારા તેમની અટકાયત કરવામાં આવી રહી છે. કોંગ્રેસ મહાસચિવ પ્રિયંકા ગાંધીની પણ પોલીસે અટકાયત કરી છે. પ્રિયંકા ગાંધી અને પોલીસ વચ્ચે ઘણી બોલાચાલી થઈ હતી. પ્રિયંકા ગાંધીની અટકાયત કરવામાં આવી તે પહેલાનો વીડિયો વાયરલ થઈ રહ્યો છે. કોંગ્રેસના પૂર્વ અધ્યક્ષ અને પ્રિયંકા ગાંધીના ભાઈ રાહુલ ગાંધીએ સમગ્ર બાબતે પ્રિયંકા ગાંધીના સાહસના વખાણ કર્યા છે. રાહુલ ગાંધીએ ટિ્વટ કરીને લખ્યું કે, પ્રિયંકા હું જાણુ છું કે તમે પાછળ નહીં હટો, તમારી હિંમત જાેઈને તે ડરી ગયા છે. ન્યાયની અહિંસક લડાઈમાં આપણે દેશના અન્નદાતાને જીતાડીને રહીશું. ઉલ્લેખનીય છે કે ઉત્તર પ્રદેશ પોલીસે પ્રિયંકા ગાંધીને તેમના ઘરમાં હાઉસ અરેસ્ટ કર્યા હતા અને પછી છોડ્યા હતા. ત્યારપછી પ્રિયંકા ગાંધીએ લખીમપુર ખીરી પહોંચવાનો પ્રયાસ કર્યો હતો. લખીમપુર પહોંચતા પહેલા હરગાંવ બોર્ડર પર પોલીસે તેમની અટકાયત કરી છે.
