અમદાવાદ ,તા.૨૯
સરદારનગર પોલીસ ઈન્સપેક્ટર એમ.એમ. સોલંકીએ જણાવ્યું હતું કે, તેમને મંગળવાર સાંજ સુધી કોઈ ફરિયાદ મળી નહોતી. ‘સામાન્ય રીતે અમે આકસ્મિક મોતનો કેસ નોંધીએ છીએ પરંતુ વૃદ્ધના કેસમાં પરિવારના સભ્યો પોલીસનો સંપર્ક કરવાથી દૂર રહે છે’, તેમ તેમણે કહ્યું હતું. અમદાવાદના રસ્તાઓ પર રસ્તે રખડતી ગાય માત્ર અડચણરૂપ જ નહીં પરંતુ જીવલેણ પણ બની રહી છે૮૦ની આસપાસની ઉંમર ધરાવતા કાંતિભાઈ માલકિયા નામના વૃદ્ધ પર ગાયે હુમલો કરતાં તેમનું મોત થયું હતું. માલકિયાને તાવ તેમજ શરદી થઈ હોવાથી તેઓ ડોક્ટર પાસે જઈ રહ્યા હતા અને તે સમયે આ ઘટના બની હતી. અમારા સહયોગી ટાઈમ્સ ઓફ ઈન્ડિયાએ જ્યારે છારાનગરમાં આવેલી રાજધાની સોસાયટીમાં રહેતા તેમના પાડોશીનો સંપર્ક કર્યો ત્યારે તેઓ આઘાતમાં હતા. માલકિયા તેમના ૨૦ વર્ષના બે પૌત્રો સૌરભ અને સોહેલ તેમજ પાડોશી અજય કમલેકર સાથે નજીકના ડોક્ટર પાસે જઈ રહ્યા હતા, ત્યારે ગાયે માલકિયાના ઘર પાસે ચારેય પર હુમલો કર્યો હતો. પાડોશીએ માલકિયાને બચાવવાનો સખત પ્રયાસ કર્યો હોવા છતાં ગાયે તેમને પાટા મારવાનું યથાવત્ રાખ્યું હતું. માલકિયા સાથે જઈ રહેલા અન્ય ત્રણ હુમલામાં નાની ઈજાઓથી બચી ગયા હતા પરંતુ માલકિયાને બચાવી શક્યા નહોતા. વૃદ્ધના પગ, પીઠ અને છાતી પર ગંભીર ઈજા પહોંચી હતી, તેમને તરત જ નજીકની હોસ્પિટલમાં લઈ જવામાં આવ્યા હતા. ડોક્ટરો તેમને બચાવી શક્યા નહોતા અને મૃત જાહેર કર્યા હતા. મૃતકનો નાનો પૌત્ર ભાંગી પડ્યો હતો. ‘તેમના અચાનક મૃત્યુથી મારા દાદી, મારા પિતા, મારી માતા અને મારા કાકા આઘાતમાં છે’, તેમ પૌત્ર સૌરભ માલકિયાએ જણાવ્યું હતું. ‘અમે જેવા અમારા ઘરની બહાર નીકળ્યા કે તરત જ રસ્તે રખડતી ગાયે હુમલો કર્યો હતો. મારા દાદાને એક બાજુ ફેંક્યા હતા જ્યારે મને સોહિલ અને અજયને અન્ય બાજુએ ફેંક્યા હતા. અમે તેને ભગાડવાનો પ્રયાસ કર્યો હતો પરંતુ ગાયે અમારા પર હુમલો કરવાનું યથાવત્ રાખ્યું હતું. મારા દાદાને ગાયે તેમના પગથી કચડી નાખ્યા હતા અને તેથી તેમને ગંભીર ઈજા પહોંચી હતી. અમે જ્યારે તેમને હોસ્પિટલ લઈ ગયા ત્યારે તેમનું પહેલા જ મોત થયું હોવાનું ડોક્ટરે જણાવ્યું હતું. મારા નાના ભાઈ સોહેલ, મને અને પાડોશી અજયને પગ તેમજ માથાના ભાગમાં સામાન્ય ઈજાઓ પહોંચી છે’, તેમ સૌરભે જણાવ્યું હતું.
