નોકરીની લાલચ આપી મુંબઈની યુવતી સાથે અમદાવાદમાં દુષ્કર્મ

અમદાવાદ
મુંબઈના અંધેરીમાં રહેતી ૨૫ વર્ષની યુવતી સોશિયલ મીડિયા દ્વારા વિશાલ રાજપૂતના સંપર્કમાં આવી હતી. બન્ને વચ્ચે વાતચીત વધારે થતા તેઓ એકબીજાની વધારે નજીક આવ્યા હતા આ પછી ફોન નંબરની આપલે થઈ હતી, જેમાં પીડિતાએ પોતાને નોકરીને જરુર હોવાની વાત વિશાલને કરી હતી. આ પછી વિશાલ રાજપૂતે યુવતીને એરપોર્ટ પર નોકરી અપાવવાની વાત કરી હતી. પોતાને નોકરીની જરુર હોવાથી યુવતી વિશાલની વાતોમાં આવેલી યુવતીને ખબર નહોતી કે તેની સાથે કંઈક ખોટું થઈ રહ્યું છે. વિશાલે ઈન્ટરવ્યુ માટે યુવતીને અમદાવાદમાં આવવા માટે કહ્યું અને યુવતી નોકરીની લાલાચે વિશાળને મળવા માટે અમદાવાદ આવી હતી, અહીંથી વિશાલ યુવતીને હોટલમાં લઈ ગયો હતો અને તેની સાથે દુષ્કર્મ આચર્યું હતું. આ પછી યુવતીને ખ્યાલ આવ્યો હતો કે તેની સાથે નોકરીના બહાને ખોટું થયું છે. આ પછી વિશાલને કશું કહ્યું વગર પરત મુંબઈ ગયેલી ૨૫ વર્ષની પીડિતાએ વિશાલ રાજપૂત સામે ફરિયાદ નોંધાવી છે. આ ઘટના અમદાવાદ એરપોર્ટ વિસ્તારમાં બની હોવાથી તપાસ માટે એરપોર્ટ પોલીસ સ્ટેશનને મુંબઈથી જાણ કરવામાં આવી હતી. અમદાવાદમાં મુંબઈથી આવેલી ફરિયાદના આધારે મરાઠી કાગળોને ગુજરાતીમાં ભાષાંતરિત કરીને વિશાલ સામે દુષ્કર્મની ફરિયાદ નોંધીને વધુ તપાસ હાથ ધરવામાં આવી છે. હવે પોલીસ દ્વારા ફરિયાદના દિવસની ઘટનાની હોટલ અને આસપાસના વિસ્તારના સીસીટીવીના આધારે તપાસ બાદ મહત્વના પુરાવા હાથ લાગે તેવી સંભાવના વ્યક્ત કરાઈ રહી છે. સોશિયલ મીડિયા પર થયેલી સામાન્ય ઓળખ બાદ થતા ગુનાના અનેક કિસ્સા પ્રકાશમાં આવ્યા છે. આમ છતાં આ પ્રકારના કિસ્સા સતત બનતા રહે છે. આવો જ એક કિસ્સો અમદાવાદમાં બન્યો છે કે જેમાં મુંબઈની યુવતી સાથે દુષ્કર્મ આચરવામાં આવ્યું હોવાની ઘટના બની છે. મુંબઈની યુવતીને અમદાવાદ બોલાવીને દુષ્કર્મ આચરનારા શખ્સ સામે મુંબઈના નાલાસોપારા પોલીસ સ્ટેશનમાં દુષ્કર્મની ફરિયાદ નોંધાવી છે.