પત્રકારે મૂળ લુધિયાણાના ન્યુઝીલેન્ડ ખેલાડી ઈશ સોઢીને હિન્દીમાં જવાબ આપવાનું કહ્યું

દુબઈ
ઈશ સોઢીએ ભારત વિરુદ્ધ શાનદાર બોલિંગ કરી હતી. તેણે ચાર ઓવરમાં ૧૭ રન આપીને બે વિકેટ ઝડપી હતી. ૨૯ વર્ષીય લેગ સ્પિનરને મેન ઓફ ધ મેચ જાહેર કરવામાં આવ્યો હતો. ઈશ સોઢીએ ભારતની બે કિંમતી વિકેટો એટલે કે વિરાટ કોહલી અને રોહિત શર્માને આઉટ કર્યા હતા. તેની બોલિંગે ભારતની મુશ્કેલી વધારી હતી. ટ્રેટ બોલ્ટની ત્રણ વિકેટ અને અન્ય બોલરોના શાનદાર પ્રદર્શનથી ન્યૂઝીલેન્ડે ભારતને ૧૧૧ના સ્કોરથી આગળ વધવા ના દીધી. કિવી પ્લેયર્સે ૧૪.૩ ઓવરમાં જ આ લક્ષ્ય હાંસલ કર્યું હતું. ટી૨૦ વર્લ્‌ડ કપમાં આ ભારતની સતત બીજી હાર છે. પાકિસ્તાન સામે હાર્યા બાદ ન્યૂઝીલેન્ડે પોતાનું ખાતું રવિવારની મેચમાં ખોલાવ્યું હતું. કેન વિલિયમ્સની કેપ્ટનશીપ હેઠળની આ ટીમ સ્કોર બોર્ડમાં ત્રીજા સ્થાને છે જ્યારે ભારતીય ટીમ ગ્રુપ ૨માં પાંચમા સ્થાને છે.ભારત અને ન્યૂઝીલેન્ડ વચ્ચેની ટી૨૦ વર્લ્‌ડ કપ મેચમાં ન્યૂઝીલેન્ડે ૮ વિકેટે ભારતને હરાવ્યું હતું. મેચમાં કિવી પ્લેયર ઈશ સોઢીએ ભારત વિરુદ્ધ જબરદસ્ત બોલિંગ કરી હતી. મેચ પૂરી થયા પછી પ્રેસ કોન્ફરન્સ દરમિયાન પત્રકારે ઈશ સોઢીને અલગ અલગ પરિસ્થિતિમાં અને પીચ પર તે બોલિંગ માટે પોતાને કેવી રીતે તૈયાર કરે છે તે અંગે સવાલ કર્યો હતો. ઈશને આ પ્રશ્ન પૂછ્યા પછી પત્રકારે તેને મજાકમાં કહ્યું કે, શું તે આ સવાલનો જવાબ હિન્દીમાં આપશે? ઈશ સોઢી મૂળ પંજાબના લુધિયાણાનો વતની છે. ઈશ ચાર વર્ષનો હતો ત્યારે તેનો પરિવાર ન્યૂઝીલેન્ડ જઈને વસી ગયો હતો. ત્યારે પત્રકારે હિન્દીમાં બોલવાનું કહેતા ઈશે પણ મજેદાર જવાબ આપ્યો હતો. ઈશે હિન્દી પર પોતાની પકડ અંગે વાત કરતાં કહ્યું, “મારા હિન્દી પર અહીં સૌની નજર ચોંટેલી હશે. સર, મને લાગે છે કે, મારી મમ્મી આ જાેશે અને એમાં હું કંઈક ખોટું બોલ્યો હોઈશ તો મારી મમ્મી મને ખૂબ લડશે. આ વખતે ઈંગ્લિશમાં જવાબ આપું છું પરંતુ આશા રાખું છું કે હું મારું હિન્દી વધુ સારું કરી લઈશ.” પત્રકારના બોલિંગ અંગેના મૂળ સવાલનો જવાબ આપતાં ઈશે આગળ કહ્યું, “મને લાગે છે કે, દરેક પરિસ્થિતિમાં પોતાને ઢાળવાની વાતો ખૂબ કરવામાં આવે છે. દુબઈના સ્ટેડિયમમાં રમાયેલી છેલ્લી ૨-૩ મેચ પર નજર કરવાની હતી. મેચ શરૂ થાય તે પહેલાની પરિસ્થિતિનો તાગ મેળવવાનો મોકો તમને બબલમાં રહીને મળે છે. આજે અમે પહેલીવાર આ મેદાન પર આવ્યા હતા. પરંતુ પરિસ્થિતિ અંગેનો અંદાજાે અમને બીજાની મેચો જાેઈને આવ્યો હતો.”