નવીદિલ્હી
દક્ષિણ આફ્રિકા સામે ટી૨૦ શ્રેણીમાં ભારતીય ટીમમાં અનેક યુવા ખેલાડીઓને તક આપવામાં આવી છે. આઈપીએલમાં પોતાની ઝડપી બોલિંગથી સૌનું ધ્યાન ખેંચનાર જમ્મુ-કાશ્મીરના બોલર ઉમરાન મલિકને પણ ભારતીય ટીમમાં સ્થાન મળ્યું છે. આ ઉફરાંત પંજાબ કિંગ્સના ડેથ ઓવર એક્સપર્ટ અર્શદીપને પણ ટીમ ઈન્ડિયામાં સામેલ કરાયો છે. ઉમરાન અને અર્શદીપ પ્લેઈંગ ઈલેવનમાં જગ્યા મેળવવા આતુર જણાય છે. જાે કે ભુવનેશ્વર કુમાર, હર્ષલ પટેલ, આવેશ ખાન સહિતના અનુભવી બોલર્સ હોવાથી યુવા ખેલાડીઓને થોડી રાહ જાેવી પડી શકે છે. દિલ્હીના મેદાનમાં ભારતીય ટીમે સોમવારે પ્રેક્ટિસ હાથ ધરી હતી. પ્રથમ સત્રમાં જ ઉમરાન મલિકની તુલનાએ અર્શદીપ સિંહ વધુ પ્રભાવી પુરવાર થયો હતો. સાંજના સમયે હેડ કોચ દ્રવિડ તેમજ બોલિંગ કોચ પારસ મહામ્બ્રેએ ખેલાડીઓને આકરી મહેનત કરાવી હતી. અર્શદીપે ટૂંકો સ્પેલ ફેંક્યા બાદ બોલિંગ કોચ મહામ્બ્રે સાથે સેશન કર્યું હતું જેમાં તેણે બ્લોકહોલ ડીલિવરી માટે પ્રેક્ટિસ કરી હતી. યોર્કર માટે કોચે આગળની ક્રિઝ પર મિડલ સ્ટમ્પ પર બેઝબોલનું ગ્લવ્ઝ મુક્યું હતું જ્યારે વાઈડ યોર્કર માટે સાઈડ ક્રિઝ પર ઠંડાપીણાની બોટલ રાખી તેને લક્ષ્ય બનાવવા જણાવ્યું હતું. ભારત અને દક્ષિણ આફ્રિકા વચ્ચે પાંચ ટી૨૦ શ્રેણી પૈકીની પ્રથમ મેચનો ૯ જૂને દિલ્હીમાં પ્રારંભ થશે. લગભગ અઢી મહિના બાદ ભારતીય ટીમ મેદાનમાં ઉતરી છે. શ્રીલંકા સામે માર્ચમાં ભારતીય ટીમે આંતરાષ્ટ્રીય મેચ રમી હતી અને ત્યારબાદ આઈપીએલમાં ખેલાડીઓ વ્યસ્ત થયા હતા. સોમવારે ભારતીય ટીમના હેડ કોચ રાહુલ દ્રવિડના માર્ગદર્શન ટીમ ઈન્ડિયાના યુવા ખેલાડીઓએ દિલ્હીના અરુણ જેટલી સ્ટેડિયમમાં નેટ્સમાં પરસેવો પાડ્યો હતો. જુલાઈમાં ઈંગ્લેન્ડ સામેની અંતિમ ટેસ્ટ અને મર્યાદિત ઓવરની શ્રેણી અગાઉ ભારતીય ટીમના કેપ્ટન રોહિત શર્મા, વરિષ્ઠ ખેલાડી વિરાટ કોહલી, ઝડપી બોલર જસપ્રીત બુમરાહ અને ઓલરાઉન્ડર રવિન્દ્ર જાડેજાને આરામ આપવામાં આવ્યો છે. દક્ષિણ આફ્રિકા વિરુદ્ધ ભારતીય ટીમની કપ્તાની કે એલ રાહુલ કરશે. કોચ રાહુલ દ્રવિડે ભારતીય ટીમના ખેલાડીઓ સાથે દિલ્હીના ફિરોઝ શાહ કોટલા સ્ટેડિયમમાં વિસ્તારપૂર્વક ચર્ચા કરી હતી. પ્રેક્સિટ પૂર્વે કોચ દ્રવિડે ખેલાડીઓ સાથે એક હર્ડલ બનાવ્યું હતું જેનો વીડિયો બીસીસીસાઈએ ટ્વીટ કર્યો હતો. આ વીડિયોમાં હેડ કોચ દ્રવિડ ખેલાડીઓને ગુરુમંત્ર આપતા નજરે પડ્યા હતા. દિલ્હીની ગરમી અને બફારા વચ્ચે પણ ખેલાડીઓએ આકરી મહેનત કરીને નેટ્સમાં પરસેવો પાડ્યો હતો. મોટાભાગે ઝડપી બોલર્સ ગરમીમાં વધુ પડતી બોલિંગ પ્રેક્ટિસ નથી કરતા પરંતુ યુવા બોલર્સ ઉમરાન અને અર્શદીપે નેટ્સમાં આકરી મહેનત કરી હતી.
