પાલનપુરની જી.ડી.મોદી કોલેજ ખાતે મતદાન જાગૃતિ કાર્યક્રમ યોજાયો

પાલનપુર
પાલનપુરની જી. ડી. મોદી કોલેજ ઓફ આર્ટ્‌સમાં એન.એસ.એસ યુનિટ દ્વારા મતદાન જાગૃતિ અંગેનો કાર્યક્રમ યોજાયો હતો. આ કાર્યક્રમમાં પાલનપુર પ્રાંત કચેરીના નાયબ મામલતદાર આશાબેન પટેલ અને નાયબ મામલતદાર બી.આર.પરમાર દ્વારા ભારતના ચૂંટણી પંચ દ્વારા આયોજિત મતદાન જાગૃતિ અંગે વિદ્યાર્થીઓને સમજ આપવામાં આવી હતી. ‘મારો મત મારૂ ભવિષ્ય અને એક મતની તાકાત’ થીમ ઉપર જૂદી જૂદી સ્પર્ધાઓ જેવી કે ક્વિઝ, વીડિયો મેકિંગ, ગીત, કોન્ટેસ્ટ પોસ્ટર ડિઝાઇન, સ્લોગન જેવી પાંચ સ્પર્ધાઓ તથા તેમાં કેવી રીતે ભાગ લઈ શકાય તેની વિગતવાર માહિતી આપવામાં આવી હતી. વિવિધ કેટેગરીના સ્પર્ધકો જેમ કે કલાપ્રેમી વ્યાવસાયિક તથા સંસ્થાકીય કોઈ પણ ભાગ લઈ શકે છે અને વિજેતા બનનારને રોકડ ઇનામ સર્ટિફિકેટ પણ મળી શકે છે વગેરે બાબતોથી માહિતગાર કરવામાં આવ્યા હતા. આ કાર્યક્રમમાં કુલ-૧૨૦ વિદ્યાર્થીઓને બી.સી.ટી. દ્વારા આયોજીત ક્વિઝ સ્પર્ધામાં ભાગ લેવડાવવામાં આવ્યો હતો. આ ઉપરાંત ૧૮ વર્ષની ઉંમર પૂરી થયેલ હોય તેવા વિદ્યાર્થીઓના નામ મતદારયાદીમાં દ્વારા દાખલ કરવા અંગેની માહિતી આપવામાં આવી હતી. આ સમગ્ર કાર્યક્રમનું આયોજન જી. ડી. મોદી કોલેજના પ્રો. ઓફિસર ડો. મનીષભાઈ રાવલ તથા ડૉ. ભારતીબેન દ્વારા કરવામાં આવ્યુ હતુ.