તેજીને ટકોરો જ કરવો પડે એ વાત આ રસ્તો ઓળંગતા અશ્ર્વ પાસેથી શિખવા જેવી ખરી. સાવરકુંડલા શહેરના હાથસણી રોડ પર અશ્ર્વ પણ સેલ્ફ ડ્રાઈવીંગ માટે નીકળતા હોય છે.

સાવરકુંડલા

(બિપીન પાંધી દ્વારા)

પ્રસ્તુત તસવીરમાં સાવરકુંડલા શહેરમાં આવેલ હાથસણી રોડ પર કેવી શાન અને સમજ સાથે સમજદાર અશ્ર્વ રસ્તો ઓળંગી રહ્યો છે. કહેવાય છે ને કે તેજીને ટકોરો જ હોય.. સાવરકુંડલા શહેરનો આ માર્ગ હમેશાં વાહનવ્યવહારથી હર્યોભર્યો જ જોવા મળે  છે. હાથસણી રોડ દ્વીમાર્ગી તો થયો. અને આ રસ્તા પર પૂરપાટ ઝડપે જતા વાહનોના ભયની વચ્ચે લોકોને  ચાલવા માટે ફૂટપાથના કોઈ ઠેકાણા જ નથી.. તંત્ર દ્વારા આ અશ્ર્વની ભાષા પણ સમજવામાં આવે તો એ પણ એમ જ કહેતો હશે કે હવે તો  ફૂટપાથ બનાવો સરકાર. કે જેથી કરીને આ રસ્તા ઉપર વયોવૃદ્ધ, સગર્ભા ગૃહિણી તથા નાના નાના ભૂલકાઓ શાંતિથી ચાલી શકે. અને કોઇ વી. વી. આઈ. પી. મહેમાનોનો કાફલો આ રોડ પરથી પસાર થાય ત્યારે આમજનતાને પોતાના ગંતવ્ય સ્થાને જવા આવવામાં કોઈ મુશ્કેલી ન નડે.