મહેસાણાથી આઈઈએલટીએસ પેપર લુંટમાં પોલીસે પંજાબથી એક શકમંદને ઝડપ્યો

મહેસાણા
મહેસાણા માલ ગોડાઉન રોડ ઉપર સરદાર પટેલ સંકુલમાં આવેલ બ્લ્યુ ડાર્ટ એક્સપ્રેસ લિમિટેડમાંથી સ્કોર્પિયો કારમાં આવેલા લૂંટારૂઓએ ઓફિસમાં મેનેજર સહિત બે કર્મચારીઓને મારી આઈઇએલટીએસના પેપર ની લૂંટ ચલાવી હતી. આ કેસમાં બી ડિવિઝન પોલીસે પંજાબથી એક શકમંદને ઉઠાવી લીધાની વિગતો પ્રકાશમાં આવી છે. તેમજ એકાદ-બે દિવસમાં પોલીસ બનાવનો ભેદ ઉકેલી શકે તેવી શક્યતા સેવાઇ રહી છે. બનાવની પોલીસમાં જાહેરાત થતાં જ કંટ્રોલ રૂમ દ્વારા ચારેતરફ નાકાબંધી કરાતા આવી હતી. છતાં લૂંટારૂઓને મહેસાણા બહાર જતા રોકવામાં સફળતા સાંપડી ન હતી. એ દરમિયાન મહેસાણા બી ડિવિઝન અને એલસીબીએ ઊંડી તપાસ હાથ ધરી હતી. આ લૂંટમાં સ્થાનિક અને પંજાબના શખ્સોની સંડોવણી હોવાનું બહાર આવતાં તે દિશામાં તપાસનો ધમધમાટ શરૂ કર્યો હતો. તેમજ પીઆઈ ઘેટિયા પોતાના સ્ટાફ સાથે પંજાબ ખાતે દોડી ગયા હતા. મહેસાણા પોલીસે પંજાબના ભટીંડા અને આસપાસના વિસ્તારોમાં સઘન તપાસ કરી લૂંટના ગુનામાં સંડોવાયેલા મનાતા એક શકમંદને ઉઠાવી લીધો હતો. જેની પૂછપરછ માટે મહેસાણા લાવવામાં આવ્યો છે, જાે કે પૂછપરછમાં લૂંટની ઘટનાનો ભેદ ઉકેલાઈ જવાની શક્યતા સેવાઇ રહી છે.