મુંબઈ
વર્ષ ૨૦૧૧માં રિલીઝ થયેલી મૂળ સાઉથ ઈન્ડિયન સફળ ફિલ્મની રીમેક ફિલ્મ ‘સિંઘમ’ બોલિવૂડમાં પણ સુપર હિટ નિવડી હતી. અજય દેવગણ અને રોહિત શેટ્ટીના કોમ્બિનેશનને દર્શકોએ વધાવી લીધું હતું, ત્યારબાદ, રોહિત શેટ્ટીએ કોપ યુનિવર્સને આગળ વધારવાનું નક્કી કર્યું હતું. પોલીસ ઓફિસર્સના જીવન અને તેમની ડ્યુટી આધારિત એક પછી એક અનેક ફિલ્મો રોહિતે બનાવી હતી. જેમાં ‘સિંઘમ ૨’,’સિમ્બા’ અને સૂર્યવંશી’ સામેલ છે. આ સાથે જ, રોહિતે તેના કોપ યુનિવર્સ કોન્સપ્ટને ઓટીટી પર પણ લાવવાનું નક્કી કર્યું છે અને સિદ્ધાર્થ મલ્હોત્રા, શિલ્પા શેટ્ટી અને વિવેક ઓબેરોયને ચમકાવતી ‘ઈન્ડિયન પોલીસ ફોર્સ’ નામની સિરીઝનું શૂટિંગ પણ શરુ થઈ ચૂક્યું છે. અજય દેવગણ અને રોહિત શેટ્ટી જૂના મિત્રો છે અને તેમણે સાથે કરેલી બધી જ ફિલ્મો બ્લોક બસ્ટર સાબિત થઈ છે. ‘સિંઘમ’ સિરીઝને આગળ વધારવાની સંપૂર્ણ તૈયારીઓ રોહિતે કરી લીધી છે. જેમાં લીડ રોલમાં ફરી એકવાર અજય દેવગણ નજર આવવાનો છે અને તેનું ટાઈટલ ‘સિંઘમ ૩’ રાખવામાં આવ્યું છે. આ અંગે રોહિતે કહ્યું હતું કે, ‘સિંઘમ ૩’ નું કામ ઘણાં સમયથી શરુ થઈ ચૂક્યું છે. અમે આગામી એપ્રિલ મહિનામાં શૂટિંગ શરુ કરવાના છીએ. અજય સર તેમના અનેક કમિટમેન્ટના કારણે સુપર બિઝી છે અને આ સમયે હું પણ મારી આવનારી ફિલ્મ ‘સર્કસ’ના પોસ્ટ પ્રોડક્શન વર્ક સાથે જાેડાયેલો છું. ‘સિંઘમ ૩’ અમારા ‘કોપ યુનિવર્સ’ની અત્યારસુધીની સૌથી મોટી ફિલ્મ હશે. રોહિત શેટ્ટીના કોપ યુનિવર્સમાં અત્યારસુધી અનેક સ્ટાર્સ જાેડાઈ ચૂક્યા છે. કોપ યુનિવર્સમાં અજય દેવગણ, અક્ષય કુમાર, રણવીર સિંહ, સિદ્ધાર્થ મલ્હોત્રા, વિવેક ઓબેરોય અને શિલ્પા શેટ્ટી સામેલ થઈ ચૂક્યા છે. ટૂંક સમયમાં મહિલા પોલીસ ઓફિસરને મુખ્ય કિરદારમાં ચમકાવતી એક ફિલ્મ પણ એનાઉન્સ થઈ શકે છે. જેની હિન્ટ રોહિતે ફિલ્મ ‘સૂર્યવંશી’ ના પ્રમોશન સમયે આપી હતી.
