મહારાષ્ટ્રમાં ગરમીનો પારો વધ્યો ઃ મુંબઈએ વર્ષો જૂનો રેકોર્ડ તોડ્યો

મહારાષ્ટ્ર
મહારાષ્ટ્રમાં શિયાળો અને કમોસમી વરસાદ બાદ પણ મોસમનો માર રોકાયો નથી. હવે ગરમીનું પ્રમાણ વધવા લાગ્યું છે. રાયગઢ અને કર્જતમાં માર્ચ મહિનામાં તાપમાન તેની રેકોર્ડ ઉંચી સપાટીએ પહોંચી ગયું છે. મુંબઈએ માર્ચ મહિનામાં ૧૯૫૬નો રેકોર્ડ તોડ્યો છે. એટલે કે આટલા વર્ષોમાં પહેલીવાર માર્ચ મહિનામાં ૪૧ ડિગ્રી તાપમાન નોંધાયું છે. મુંબઈના ઘણા વિસ્તારોમાં ગરમીનો પ્રમાણ ૪૧ ડિગ્રી સેલ્સિયસ નોંધાયું. એટલે કે ગરમી વધવાની હવામાન વિભાગની આગાહી સાચી સાબિત થતી જાેવા મળી રહી છે. મહારાષ્ટ્રના કોંકણ ક્ષેત્રના ઘણા વિસ્તારોમાં તાપમાન પણ ૪૦ ડિગ્રી સેલ્સિયસને પાર કરી ગયું છે. અહીં અનેક વિસ્તારોમાં ગરમીનું મોજું શરૂ થઈ ગયું છે. મુંબઈને અડીને આવેલા રાયગઢ અને કર્જતમાં અત્યાર સુધીમાં સૌથી વધુ તાપમાન નોંધાયું છે. આ સમયે અહીં તાપમાન ૪૪.૨ પર પહોંચી ગયું છે. મંગળવારે પરભણીમાં ૩૮.૦૨ ડિગ્રી સેલ્સિયસ તાપમાન નોંધાયું હતું. વાશિમમાં ૩૯ ડિગ્રી સેલ્સિયસ તાપમાન નોંધાયું હતું. મુંબઈમાં ઘણી જગ્યાએ તાપમાન ૪૦ ડિગ્રી સેલ્સિયસ નોંધાયું હતું. અગાઉ ૧૯૫૬માં માર્ચ મહિનામાં તાપમાન ૪૧ ડિગ્રી સેલ્સિયસ સુધી પહોંચી ગયું હતું. હવામાન વિભાગે આગામી બે દિવસ મુંબઈ, થાણે, પાલઘર, રાયગઢમાં હીટ વેવ રહેવાની આગાહી કરી છે. હવામાન નિષ્ણાત કે હોસાલીકર એ મુંબઈમાં આ ઝડપથી વધી રહેલી ગરમીનું કારણ જણાવ્યું છે. તેમણે ટિ્‌વટ કરીને કહ્યું છે કે આગામી બે દિવસમાં મુંબઈમાં તાપમાન ૩૯ ડિગ્રી સેલ્સિયસ રહેશે. તે પછી તે ધીમે ધીમે ઘટશે. વધતા તાપમાનને જાેતા ભારતીય હવામાન વિભાગે મુંબઈ, થાણે અને કોંકણ વિસ્તારોમાં આગામી બે દિવસ માટે એલર્ટ જાહેર કર્યું છે. હવામાન વિભાગે દરિયાકાંઠાના વિસ્તારોમાં તાપમાન સામાન્ય કરતા ૪.૫ ડિગ્રી વધુ રહેવાની આગાહી કરી છે. કોંકણ માટે ઓરેન્જ એલર્ટ જારી કરવામાં આવ્યું છે. વધતી જતી ગરમીમાં નાના બાળકો અને વૃદ્ધોને તેમના સ્વાસ્થ્યનું ધ્યાન રાખવાની સલાહ આપવામાં આવી છે. ડીહાઈડ્રેશનથી બચવા માટે શરીરમાં પાણીની કમી ન થાય તેનું ખાસ ધ્યાન રાખવાનું કહેવામાં આવ્યું છે. ગરમીના કારણે પેટમાં ખેંચાણ, થાક વધવો, હીટસ્ટ્રોક જેવી અનેક સમસ્યાઓ સામે આવી શકે છે. તેથી જ પુષ્કળ પાણી પીવાનું ચાલુ રાખવાની સલાહ આપવામાં આવી છે.