અફઘાનિસ્તાન
અફઘાનિસ્તાનના બેટ્સમેન રહમત શાહના ૯૪ રન અને ત્યારબાદ મોહમ્મદ બનીએ ચાર વિકેટ ઝડપતાં પ્રવાસી ટીમે ઝિમ્બાબ્વે સામે પ્રથમ આંતરાષ્ટ્રીય વન-ડેમાં ૬૦ રને શાનદાર વિજય મેળવ્યો હતો. અફઘાનિસ્તાનની ટીમ ૨૦૧૪થી અત્યાર સુધીમાં ઝિમ્બાબ્વે સામે પાંચ શ્રેણી રમી છે અને તે પૈકી એકપણ શ્રેણીમાં તેનો પરાજય નથી થયો. શનિવારે હરારે સ્પોર્ટ્સ ક્લબ ખાતે રમાયેલી પ્રથમ વન-ડેમાં અફઘાનિસ્તાને પાંચ વિકેટે ૨૭૬ રન કર્યા હતા જેની સામે ઝિમ્બાબ્વે ૨૧૬ રનમાં સમેટાઈ ગયું હતું. રહમત શાહ અને કેપ્ટન હસમતુલ્લાહ શાહિદીએ સાવચેતી સાથે શરૂઆત કરી હતી અને બન્નેએ પોતાની અડધી સદી ફટકાર્યા બાદ લય મેળવતા ફટકાબાજી કરી હતી. અફઘાનિસ્તાન તરફથી બન્નેએ ત્રીજી વિકેટ માટે ૧૮૧ રનની ભાગીદારી નોંધાવી હતી. શાહે ઝડપી બોલર્સ તથા સ્પિન બોલર્સનો આરામથી સામનો કર્યો હતો અને સાત ચોગ્ગા તેમજ ત્રણ છગ્ગાના સહારે ૧૨૦ બોલમાં ૯૪ રન ફટકાર્યા હતા. બીજીતરફ શાહિદીએ ૧૦૪ બોલમાં ૧૩ ચોગ્ગાની મદદથી ૮૮ રન કર્યા હતા. બન્ને બેટ્સમેન ઝિમ્બાબ્વેના ઝડપી બોલર મુઝારાબાનીનો શિકાર બન્યા હતા, જેણે ૫૨ રનમાં ચાર વિકેટ ઝડપી હતી. મુઝારાબાની તાજેતરમાં આઈપીએલમાં લખનૌ સુપર જાયન્ટ્સના પ્રેક્ટિસ બોલર તરીકે જાેડાયો હતો અને ત્યારબાદ તેણે આંતરાષ્ટ્રીય ક્રિકેટમાં પુનરાગમન કર્યું હતું.
