ચંડીગઢ
પંજાબમાં સત્તારૂઢ આમ આદમી પાર્ટીને મોટો ઝટકો લાગ્યો છે. વિજિલન્સે આખરે આમ આદમી પાર્ટીના ભટિંડા ગ્રામીણ ધારાસભ્ય અમિત રતન કોટફટ્ટાની ધરપકડ કરી છે, જે લાંચના કેસમાં તેમના પીએ રિશમ ગર્ગની ધરપકડ થઈ ત્યારથી પંજાબ વિજિલન્સની તપાસના રડાર પર છે. બુધવારે મોડી રાત્રે અમનની ધરપકડ કરવામાં આવી હતી. વિજિલન્સની ટીમ હજુ પણ ધારાસભ્યના ઘરે હાજર છે. જ્યારે ધારાસભ્યનો પીએ ૪ લાખની લાંચ લેતા વિજિલન્સ ટીમે રંગે હાથે ઝડપ્યો હતો અને ધારાસભ્ય પણ સ્થળ પર હાજર હતા. તે સમયે ધારાસભ્ય અમિત રતને કહ્યું હતું કે તેમની પાસે રિશમ ગર્ગ નામનો કોઈ પીએ નથી, પરંતુ વિજિલન્સે એફઆઈઆરમાં ધારાસભ્યનું નામ પણ નોંધ્યું છે. ત્યારથી તેની ધરપકડની માગ ઉઠી હતી. વિજિલન્સની ટીમ હજુ પણ તેના ઘરે હાજર છે. ટીમ ઘરની તપાસ કરી રહી છે કે કોર્ટમાં રજૂ કરવાની તૈયારી કરી રહી છે, આ અંગે વધુ માહિતી આવવાની બાકી છે. આરોપ છે કે ૧૬ ફેબ્રુઆરીએ પંજાબના ભટિંડા (ગ્રામીણ)ના આમ આદમી પાર્ટીના ધારાસભ્ય અમિત રતન કોટફટ્ટાએ તેના પીએ રિશમ ગર્ગ દ્વારા ઘુડ્ડા ગામની મહિલા સરપંચના પતિ પાસેથી ૪ લાખ રૂપિયાની લાંચ લીધી હતી. પંચાયત ખરડો પસાર કરવાનો હતો. ધારાસભ્યની કારમાંથી પૈસા મળી આવ્યા છે. વિજિલન્સે છટકું ગોઠવીને આ કાર્યવાહી કરી હતી. આ પૈસા ભટિંડા સર્કિટ હાઉસમાં આપવામાં આવ્યા હતા અને તે સમયે ધારાસભ્ય પણ સ્થળ પર હાજર હતા. તે સમયે પણ ધારાસભ્યને કસ્ટડીમાં લેવામાં આવ્યા હતા પરંતુ પૂછપરછ બાદ મોડી રાત્રે છોડી મુકવામાં આવ્યા હતા. પરંતુ ઘટના બાદથી વિપક્ષી પાર્ટીઓ અને સરપંચના પતિએ લાંચનો આરોપ લગાવતા ધારાસભ્ય પર સતત ભ્રષ્ટાચારના આક્ષેપો કરી રહ્યા હતા. તપાસ પૂર્ણ કર્યા બાદ વિજિલન્સે ધારાસભ્યની ધરપકડ કરી છે. જ્યારથી ધારાસભ્યનો વીડિયો સામે આવ્યો છે ત્યારથી વિપક્ષી પાર્ટીઓ રાજ્યની માન સરકાર પર તેમની ધરપકડ કરવા દબાણ કરી રહી છે.
