નવીદિલ્હી
અદાણી ગ્રુપે ગુજરાતના મુંદ્રા ખાતે શ્૩૪,૯૦૦ કરોડના પેટ્રોકેમિકલ પ્રોજેક્ટનું કામ તાત્કાલિક અસરથી સ્થગિત કરી દીધું છે. ગ્રુપે તેના ઓપરેશન્સ કોન્સોલિડેટ કરવા તરફ અને અમેરિકન શોર્ટ સેલર હિન્ડેનબર્ગને કારણે રોકાણકારોની જે ચિંતા વધી છે તેને દૂર કરવા પર ફોકસ કર્યું હોવાનું સૂત્રોએ કહ્યું હતું. અદાણી ગ્રુપની ફ્લેગશિપ કંપની અદાણી એન્ટરપ્રાઈસીસ લિમિટેડે કચ્છ જિલ્લામાં અદાણી પોર્ટ્સ એન્ડ સેઝની જમીન પર કોલસા આધારીત પીવીસીનો ગ્રીનફિલ્ડ પ્લાન્ટ સ્થાપવા માટે ૨૦૨૧માં સંપૂર્ણ સબસિડરી મુંદ્રા પેટ્રોકેમ લિમિટેડ સ્થાપી હતી. પરંતુ હિન્ડેનબર્ગ રિસર્ચના ૨૪ જાન્યુઆરીએ જાહેર થયેલા રિપોર્ટ બાદ અદાણી ગ્રુપની દશા માઠી બેસી અને તેના માર્કેટ કેપમાં ૧૪૦ અબજ ડોલરનું ભયાનક ગાબડું પડી ગયું હતું. તેને કારણે રોકાણકારોમાં ચિંતા વધી જતા અદાણી ગ્રુપે હવે કમબેક સ્ટ્રેટજી ઘડી છે. આ સ્ટ્રેટજી અંતર્ગત ગ્રુપે કેટલીક લોન પરત ચૂકવી દઈને દેવું ઓછું કર્યું છે, ઓપરેશન્સ કોન્સોલિડેટ કર્યા છે, અને આક્ષેપો સામે લડત આપી રહ્યું છે. સૂત્રોએ કહ્યું હતું કે આ સ્ટ્રેટજીના ભાગરૂપે તેણે ૧૦ લાખ ટનની વાર્ષિક ક્ષમતાનો પીવીસી ગ્રીનફિલ્ડ પ્રોજેક્ટ હાલ આગળ નહીં ધપાવવાનો ર્નિણય કર્યો છે. અદાણી ગ્રુપે વેન્ડર્સ અને સપ્લાયર્સને તાત્કાલિક અસરથી ‘તમામ પ્રવૃત્તિ સ્થગિત કરી દેવાના’ મેસેજ સાથે મેઈલ કરી દીધા છે. મેઈલમાં તેણે મુંદ્રા પેટ્રોકેમ લિમિટેડના ગ્રીન પીવીસી પ્રોજેક્ટની તમામ પ્રવૃત્તિ-કામગીરી નવી જાણ ન થાય ત્યાં સુધી સ્થગિત કરી દેવા કહ્યું છે. મેનેજમેન્ટે કહ્યું કે તે અલગ-અલગ બિઝનેસ વર્ટિકલ્સમાં વિવિધ પ્રોજેક્ટ્સના અમલ અંગે પુનઃમૂલ્યાંકન કરી રહ્યું છે. ભવિષ્યના કેશફ્લો અને ફાઈનાન્સને આધારે કેટલાક પ્રોજેક્ટ્સ ચાલુ રાખવા કે કેમ અને કેટલાકમાં પ્રોજેક્ટના સમયગાળા અંગે પુનઃમૂલ્યાંકન થઈ રહ્યું છે. અદાણી ગ્રુપના પ્રવક્તાએ કહ્યું હતું કે ‘અદાણી એન્ટરપ્રાઈસીસ લિમિટેડ આગામી મહિનાઓમાં પ્રાઈમરી ઈન્ડસ્ટ્રી વર્ટિકલમાં ગ્રોથ પ્રોજેક્ટ્સનાં સ્ટેટસનું મૂલ્યાંકન કરશે.’ કચ્છના આ યુનિટમાં વાર્ષિક ૨૦૦ કિલો ટન પોલિ-વિનાઈલ-ક્લોરાઈડ(પીવીસી)નું ઉત્પાદન થવાનું હતું જેના માટે ૩૧ લાખ ટન વાર્ષિક કોલસાની જરૂર પડવાની હતી જે ઓસ્ટ્રેલિયા, રશિયા અને અન્ય દેશોમાંથી આયાત કરવાનો હતો. પીવીસી એ વિશ્વમાં ત્રીજા ક્રમનું સૌથી વ્યાપક પ્રમાણમાં ઉત્પાદન કરાતું સિન્થેટિક પ્લાસ્ટિક પોલિમર છે.
