નવીદિલ્હી
ભારતીય ક્રિકેટ ટીમ જ્યારે મેદાન પર કોઈ આઈસીસી ટૂર્નામેન્ટ રમવા ઉતરે છે તો સૌથી પહેલાં ચાહકોની નજર પાકિસ્તાન વિરુદ્ધ રમાનારા મુકાબલા પર જાય છે. આ મહિનાથી આફ્રિકામાં મહિલા ટી-૨૦ વર્લ્ડકપની શરૂઆત થઈ રહી છે. ૧૦ ફેબ્રુઆરીથી શરૂ થનારી આ ટૂર્નામેન્ટમાં ભારત-પાકિસ્તાનની ટીમ એક જ ગ્રુપમાં છે અને તેના વચ્ચે પહેલી ટક્કર રોમાંચક થવાની શક્યતા છે. આઈસીસીની વધુ એક મોટી ટૂર્નામેન્ટનો પ્રારંભ થવા જઈ રહ્યો છે. તાજેતરમાં જ ભારતીય અન્ડર-૧૯ ટી-૨૦ વિશ્વકપની ટ્રોફી પોતાના નામે કરી છે. હવે ભારત સળંગ બીજા વર્લ્ડકપ ખીતાબને હાંસલ કરવા એડીચોટીનું જાેર લગાવી દેશે. સાઉથ આફ્રિકામાં ૧૦થી ૨૬ ફેબ્રુઆરી વચ્ચે મહિલા ટી-૨૦ વિશ્વકપની આઠમી એડિશનનું આયોજન થવાનું છે. ૧૦ ટીમો તેમાં ભાગ લેશે અને ૧૭ દિવસમાં કુલ ૨૩ મુકાબલા રમાશે. આ તમામ મુકાબલાઓ વચ્ચે સૌની નજર ભારત-પાકિસ્તાન મેચ પર રહેશે. મહિલા ટી-૨૦ વર્લ્ડકપમાં ઉતરી રહેલી તમામ ૧૦ ટીમોને પાંચ-પાંચના બે ગ્રુપમાં વહેંચવામાં આવી છે. મેજબાન સાઉથ આફ્રિકાને ઑસ્ટ્રેલિયા, બાંગ્લાદેશ, ન્યુઝીલેન્ડ અને શ્રીલંકા સાથે રાખવામાં આવી છે. જ્યારે ગ્રુપ-બીમાં ભારતની ટીમને પાકિસ્તાન, ઈંગ્લેન્ડ, આયર્લેન્ડ અને વિન્ડિઝ સાથે જગ્યા આપવામાં આવી છે. ભારતીય ટીમ પોતાના ટી-૨૦ વિમેન્સ વિશ્વકપ અભિયાનની શરૂઆત પાકિસ્તાન વિરુદ્ધ મુકાબલાથી કરવાની છે. ભારત-પાકિસ્તાન વચ્ચે આ મેચ ૧૨ ફેબ્રુઆરીએ રમાશે. જાે બન્ને ટીમો આ ગ્રુપમાંથી નોકઆઉટમાં પહોંચે છે તો પછી ફાઈનલમાં તેમના વચ્ચે મુકાબલો થઈ શકે છે. વિશ્વકપનો ફાઈનલ ૨૬ ફેબ્રુઆરીએ રમાશે.
