નવીદિલ્હી
કેન્દ્રીય ગૃહમંત્રી અમિત શાહે આજે કહ્યું કે, અંગ્રેજાે ભારત છોડીને ચાલ્યા ગયા છે અને હવે સમય આવી ગયો છે કે, ભારતીય પરિપ્રેક્ષ્યમાં ઈતિહાસ લખવામાં આવે. વસાહતી ભૂતકાળના તમામ અવશેષોથી છુટકારો મેળવવાના વડા પ્રધાન નરેન્દ્ર મોદીના ઉદ્દેશ્યને અનુરૂપ સંસ્થાનવાદી ભૂતકાળના ઇતિહાસમાંથી મુક્તિ મેળવવી સૌથી મહત્વપૂર્ણ છે. ૧૮૫૭ના વિદ્રોહને આઝાદીનું પ્રથમ યુદ્ધ કહીને વીર સાવરકરે પહેલીવાર તેનો પ્રયત્ન કર્યો હતો. એક પુસ્તક વિમોચન સમારોહમાં અમિત શાહે કહ્યું કે, ભારતની આઝાદીમાં ‘અહિંસક સંઘર્ષ’નું મોટું યોગદાન હતું પરંતુ હાલમાં અન્યની તેમાં કોઈ ભૂમિકા નથી તેવો દ્રષ્ટિકોણ બનાવવો યોગ્ય નથી. શાહે કહ્યું કે, જાે સશસ્ત્ર ક્રાંતિનો સમાંતર પ્રવાહ શરૂ ન થયો હોત તો આઝાદી મેળવવામાં હજુ પણ ઘણા દાયકાઓ લાગી ગયા હોત. આપણે સમજવું પડશે કે, આપણને આઝાદી અનુદાનના રૂપમાં નથી મળી. તે લાખો લોકોના બલિદાન અને રક્તપાત બાદ મળી છે. આજે જ્યારે હું કર્તવ્યપથ પર સ્થાપિત નેતાજી સુભાષ ચંદ્ર બોઝની પ્રતિમા જાેઉં છું તો મને ખૂબ જ સંતોષ મળે છે. અમિત શાહની આ ટિપ્પણી સંજીવ સાન્યાલનું પુસ્તક – ‘રિવોલ્યુશનરીઝ, ધ અધર સ્ટોરી ઓફ હાઉ ઈન્ડિયા ઓવન્ડ ઈટ્સ ફ્રીડમ’ ના વિમોચન પ્રસંગે આવી છે. અમિત શાહે કહ્યું હતું કે, ‘અધર સ્ટોરી’ શબ્દ આ પુસ્તકનો સારાંશ છે. આઝાદીની કથામાં એક દ્રષ્ટિકોણને જનતામાં વર્ષોથી સ્થાપિત કરવામાં આવ્યો છે. આ એક દૃષ્ટિકોણ ઈતિહાસ લેખન અને શિક્ષણ દ્વારા લોકો પર લાદવામાં આવ્યો છે. હું એમ નથી કહેતો કે, અહિંસક સ્વાતંત્ર્ય સંગ્રામમાં સંઘર્ષની કોઈ ભૂમિકા નથી, અથવા તે કોઈ નથી. તે ઈતિહાસનો એક ભાગ છે અને તેનું ખૂબ જ મોટું યોગદાન છે. પરંતુ અહિંસક ચળવળ હોય કે સશસ્ત્ર ક્રાંતિ બંનેનો પાયો ૧૮૫૭ની ક્રાંતિમાં હતો અને તેની જવાબદારી સરકારની સાથે સાથે ઈતિહાસકારોની પણ છે કે તેઓ સાચા ઐતિહાસિક તથ્યો નવી પેઢી સમક્ષ રજૂ કરે. ગૃહમંત્રીએ કહ્યું કે, અંગ્રેજાેએ ભારત છોડી દીધું પરંતુ ઈતિહાસ તેમના ચશ્માથી લખવામાં આવ્યો. હજુ પણ મૂંઝવણ યથાવત છે. તેમણે કહ્યું કે, લોકો કહે છે કે આજ સુધી વિવિધ કારણોસર ઈતિહાસને વિકૃત કરવામાં આવ્યો છે પરંતુ હવે આપણને તેને યોગ્ય રીતે લખતા કોઈ રોકી શકશે નહીં. તેમણે કહ્યું કે ઈતિહાસને ઉગ્રવાદીઓ વિરુદ્ધ મધ્યમવાદીઓના પ્રવાહમાંથી હટાવીને વાસ્તવિક બનાવવો પડશે. ભારતમાં ૨૦૦ વર્ષથી વધુ સમય સુધી મુઘલોનું શાસન હોવાના દાવાને નકારતા અમિત શાહે કહ્યું કે, જ્યારે પણ અમને કહેવામાં આવે છે કે મુઘલો પ્રથમ સામ્રાજ્ય હતા તેઓએ ૨૦૦ વર્ષથી વધુ સમય સુધી આ દેશ પર શાસન કર્યું છે પરંતુ એવું નથી. એવા અન્ય સામ્રાજ્યો પણ છે જેઓએ ૨૦૦ થી વધુ વર્ષો સુધી ભારત પર શાસન કર્યું છે.
