નવીદિલ્હી
દિલ્હીમાં એક વ્યક્તિએ પોતાના લિવ-ઈન પાર્ટનરની હત્યા કરી નાખી. ત્યારબાદ તેની લાશને ૧૨ કિમી દૂર જઈને ફેંકી દીધી. આ બાબતનો ખુલાસો કરતાં પોલીસે આરોપીની બહેનની ધરપકડ કરી હતી. મહિલાએ ગુનામાં તેના ભાઈને સાથ આપ્યો હતો. જાેકે, મુખ્ય આરોપી અને તેનો એક સાથી હજુ પોલીસ પકડની બહાર છે. આ મામલો ઉત્તર પૂર્વ દિલ્હીના કરવલ નગર વિસ્તારનો છે. ડીસીપી જાેય ટ્રીકીએ કહ્યું કે ૧૨ એપ્રિલે અમને માહિતી મળી હતી કે આ વિસ્તારમાં એક મહિલાની લાશ પડી છે. માહિતી મળતાં જ પોલીસ ઘટનાસ્થળે પહોંચી, મૃતદેહને કબજામાં લઈ પોસ્ટમોર્ટમ માટે મોકલી આપ્યો. પોસ્ટમોર્ટમ રિપોર્ટમાં સામે આવ્યું છે કે મહિલાનું મોત શ્વાસ રૂંધાવાને કારણે થયું છે. પોલીસે કરવલ નગર પોલીસ સ્ટેશનમાં હત્યાનો ગુનો નોંધીને તપાસ શરૂ કરી છે. ડીસીપીએ કહ્યું કે પોસ્ટમોર્ટમ રિપોર્ટ આવ્યા બાદ ૫૫ પોલીસકર્મીઓની ટીમ બનાવવામાં આવી હતી. ટીમે વિસ્તારમાં લાગેલા સીસીટીવી કેમેરાનું સ્કેનિંગ શરૂ કર્યું હતું. ૨૦ એપ્રિલના રોજ પોલીસને એક સીસીટીવી ફૂટેજ મળ્યો હતો, જેમાં એક વ્યક્તિ પોતાના ખભા પર મૃતદેહ લઈને જતો જાેવા મળ્યો હતો. તેની પાછળ એક મહિલા પણ ચાલી રહી હતી. સીસીટીવીમાં દેખાતા લોકોની ઓળખ વિનીત અને તેની બહેન પારુલ તરીકે થઈ હતી. મૃતકની ઓળખ રોહિના નાઝ ઉર્ફે માહી તરીકે થઈ છે. પોલીસે વિનીત અને પારુલની શોધખોળ શરૂ કરી હતી, પરંતુ બંને ફરાર થઈ ગયા હતા અને તેમના ઘરનું તાળું હતું. પડોશીઓએ જણાવ્યું કે ૨૦ એપ્રિલે પારુલ તેના બે બાળકો સાથે ટોંગામાં ક્યાંક ગઈ હતી. તપાસમાં જાણવા મળ્યું કે તે મૂળ યુપીના બાગપતની છે. પોલીસે સીસીટીવી ફૂટેજની મદદથી ટોંગા ડ્રાઇવરને શોધી કાઢ્યો, તેની પૂછપરછ કર્યા પછી પારુલની કૃષ્ણ નગરમાંથી ધરપકડ કરવામાં આવી. પૂછપરછ દરમિયાન પારુલ કબૂલ કરે છે કે તેના ભાઈએ જ માહીની હત્યા કરી હતી અને તે પણ કાવતરામાં સામેલ હતી.પોલીસે જણાવ્યું કે વિનીત અને રોહિના નાઝ ૪ વર્ષ પહેલા ઘરેથી ભાગી ગયા હતા. ત્યારથી તેઓ દિલ્હીમાં સાથે રહેતા હતા. માહી લિવ-ઈન પાર્ટનર વિનીતને લગ્ન કરવા માટે દબાણ કરી રહી હતી, પરંતુ વિનીતનો પરિવાર આ લગ્નની વિરુદ્ધ હતો કારણ કે માહી અન્ય સમુદાયની હતી. આ બાબતે વિનીત અને માહી વચ્ચે અવારનવાર ઝઘડા થતા હતા. આ કારણોસર વિનીતે તેની બહેન પારુલ સાથે મળીને માહીની હત્યાનું કાવતરું ઘડ્યું અને ૧૨ એપ્રિલે વિનીતે માહીનું ગળું દબાવીને હત્યા કરી દીધી. હત્યા બાદ રાત્રે વિનીતે તેના મિત્ર સાથે મળીને માહીની લાશનો નિકાલ કરવાનો પ્લાન બનાવ્યો હતો. વિનીતનો મિત્ર બાઇક લઇને બહાર શેરીમાં ઉભો હતો. જ્યારે વિનીત મૃતદેહને ખભા પર લઈને શેરીની બહાર ગયો હતો. આ દરમિયાન પારુલ તેના ભાઈને ફોલો કરતી હતી. ત્યારબાદ વિનીત તેના મિત્ર સાથે મળીને માહીની લાશને બાઇક પર લઈ ગયો અને તેને લગભગ ૧૨ કિલોમીટર દૂર ફેંકી દીધી.
