નવીદિલ્હી
આઇપીએલની ટી૨૦ ક્રિકેટ ટુર્નામેન્ટમાં બુધવારે રાજસ્થાન રોયલ્સે શાનદાર દેખાવ કરીને છેક છેલ્લા બોલ સુધી પહોંચેલી મેચમાં ચેન્નાઈ કિંગ્સને ત્રણ રનથી રોમંચક ઢબે હરાવ્યું હતું, હકીકતમાં મહેન્દ્રસિંહ ધોની અને રવીન્દ્ર જાડેજા જેવા બેટ્સમેન ક્રિઝ પર હતા અને છેલ્લી ઓવરમાં ૨૧ રનની જરૂર હતી ત્યારે ધોનીએ ઉપરા ઉપરી બે સિક્સર પણ ફટકારી હતી પરંતુ રવીન્દ્ર જાડેજા મોટો શોટ રમી શક્યો ન હતો અને ટીમને પરાજયનો સામનો કરવો પડ્યો હતો. રાજસ્થાન માટે છેલ્લી ઓવર ઝડપી બોલર સંદીપ શર્માએ ફેંકી હતી જે અનુભવમાં અને ખાસ કરીને છેલ્લી ઓવરમાં ધોની જેવા બેટ્સમેન સામે બોલિંગ કરવામાં ઘણો પાછળ હતો પરંતુ તેણે જ કમાલ કરી દેખાડી અને ચેપોકના હિરો માહીને અંકુશમાં રાખી દીધો. ચેન્નાઈ સુપર કિંગ્સ ૨૦મી ઓવર અગાઉથીુ જ મેચ જીતી શકે તેમ હતી પરંતુ તેમણે મેચને લાંબી ચલાવી જેનું પરિણામ તેમની વિરુદ્ધમાં આવ્યું હતું. આ સાથે રાજસ્થાન રોયલ્સે ૨૦૦૮ બાદ પહેલી વાર ચેપોક ખાતે ચેન્નાઈ સુપર કિંગ્સને હરાવ્યું હતું.
