સામૂહિક વન નિર્માણ યોજના અંતર્ગત છેલ્લા બે વર્ષમાં અરવલ્લી જિલ્લાના મોડાસા તાલુકામાં કુલ ૧.૧૭ લાખથી વધુ રોપાઓનું વાવેતર કરાયુંઃ વન અને પર્યાવરણ મંત્રી

ગાંધીનગર
ગુજરાત વિધાનસભા ગૃહ ખાતે સામૂહિક વન નિર્માણ યોજના અંગે પૂછાયેલા પ્રશ્નનો જવાબ આપતા વન અને પર્યાવરણ મંત્રી મુળુભાઈ બેરાએ જણાવ્યું હતું કે, અરવલ્લી જિલ્લાના મોડાસા તાલુકામાં વર્ષ ૨૦૨૧-૨૨માં ૫૩,૧૧૧ અને વર્ષ ૨૦૨૨-૨૩માં ૬૪,૨૨૨ મળી કુલ ૧,૧૭,૩૩૩ જેટલા રોપાનું વાવેતર કરવામાં આવ્યું છે.
મંત્રીએ વધુ વિગતો આપતા જણાવ્યું હતું કે, વૃક્ષોના વાવેતર માટે વર્ષ ૨૦૨૧-૨૨માં રૂ. ૪૨.૮૯ લાખ અને વર્ષ ૨૦૨૨-૨૩માં ૫૮.૨૩ લાખ મળી બે વર્ષમાં કુલ રૂ. ૧૦૧.૧૨ લાખ ખર્ચ કરવામાં આવ્યો છે.
અત્રે ઉલ્લેખનીય છે કે, આ રોપાઓમાં મુખ્યત્વે અરડુશા, નીલગીરી, લીમડા, દેશીબાવળ, કરંજ, જામફળી, ખાટી આમલી, સીસુ, સીરસ અને પેલટોફોમૅ વગેરે જાતના રોપાઓનું વાવેતર કરવામાં આવ્યું છે.