વારાણસી
ઉત્તર પ્રદેશ સરકાર ગરીબો, અનાથ અને મજૂરોના હોંશિયાર બાળકોને શ્રેષ્ઠ સુવિધાઓ સાથે રેસિડેન્શિયલ સ્કુલોમાં ભણાવવાની તૈયારીઓને આખરી ઓપ આપી રહી છે. અટલ રેસિડેન્શિયલ સ્કૂલો રાજ્યના ૧૮ જિલ્લામાં ચલાવવાની છે. તેમાં પણ ૧૬ જિલ્લામાં નિર્માણ કાર્ય લગભગ પૂર્ણ થઈ ગયું છે. આમાં ઓગસ્ટના અંત સુધીમાં ધોરણ ૬ માટે વાંચન શરૂ કરવાની તૈયારીઓ છે અને બાકીની ૨ શાળાઓને પણ આ વર્ષના અંત સુધીમાં કાર્યરત કરી શકાશે. ૧૧૮૯.૮૮ કરોડના ખર્ચે બનાવવામાં આવી રહેલી આ ૧૮ રેસિડેન્શિયલ સ્કૂલોમાં તમામ સારી સુવિધાઓ ઉપલબ્ધ થશે. આ શાળાઓમાં ધોરણ ૬ થી ૧૨ ભણાવવામાં આવશે. આઝમગઢ, બસ્તી, લખનૌ, અયોધ્યા, બુલંદશહર (મેરઠ), ગોંડા, ગોરખપુર, લલિતપુર (ઝાંસી), પ્રયાગરાજ, સોનભદ્ર (મિર્ઝાપુર), મુઝફ્ફરનગર (સહારનપુર), બાંદા, અલીગઢ, આગ્રા, વારાણસી, કાનપુર, મોરાદાબાદ અને બરેલીમાં અટલ રેસિડેન્શિયલ સ્કૂલનું સંચાલન થવાનું છે. અટલ રેસિડેન્શિયલ સ્કૂલ માટે ટીચિંગ અને નોન-ટીચિંગ સ્ટાફની નિમણૂકની પ્રક્રિયા પણ લગભગ પૂર્ણ થઈ ગઈ છે. જેમાં આચાર્યોની નિમણૂંક ૫ એપ્રિલ સુધીમાં જ્યારે વહીવટી અધિકારીઓની નિમણૂકની પ્રક્રિયા ૨૨મી જૂને પૂર્ણ કરવામાં આવી છે. તેવી જ રીતે શિક્ષકોની નિમણૂક પ્રક્રિયા ૨૬મી જૂને પૂર્ણ કરવામાં આવી છે. બીજી તરફ નોન ટીચિંગ સ્ટાફ માટે ઇન્ટરવ્યુ પ્રક્રિયા ચાલી રહી છે જે અંતિમ તબક્કામાં છે. આ સાથે તમામ શાળાઓ માટે ફર્નિચર, મેસ સર્વિસ, ફેકલ્ટી મેનેજમેન્ટ, યુનિફોર્મ અને અન્ય એસેસરીઝની ઉપલબ્ધતા પણ વહેલી તકે પૂર્ણ કરવામાં આવશે. આ કામ પણ અંતિમ તબક્કામાં છે. આ શાળાઓમાં મફત હોસ્ટેલની સુવિધા હશે. બાળકો માટે યુનિક શૈક્ષણિક અભ્યાસક્રમ પણ તૈયાર કરવામાં આવ્યો છે. આ સાથે અહીં કોમ્પ્યુટર લેબ, સાયન્સ લેબ, મેથેમેટિક્સ લેબ, સોશિયલ સાયન્સ લેબ, અટલ થિંકીંગ લેબ અને એક્સપેરીમેન્ટલ લેબની સુવિધા પણ ઉપલબ્ધ હશે. બાળકોના પ્રવેશની પ્રક્રિયા પૂર્ણ થઈ ગઈ છે.
