પેરિસ
વડાપ્રધાન નરેન્દ્ર મોદી ફ્રાંસના પ્રવાસે છે. આ દરમિયાન તેણે શુક્રવારે ફ્રાન્સના રાષ્ટ્રપતિ ઈમેન્યુઅલ મેક્રોનને ભેટ તરીકે ચંદનની સિતાર આપી હતી. પીએમ મોદીએ ફ્રાન્સના રાષ્ટ્રપતિની પત્ની, ફ્રાન્સના વડાપ્રધાન, ફ્રાન્સની સેનેટના પ્રમુખ અને ફ્રેન્ચ નેશનલ એસેમ્બલીના પ્રમુખને પણ ભેટ આપી હતી. રાષ્ટ્રપતિ મેક્રોનને ભેટમાં આપેલા સંગીતના વાદ્ય સિતારની આ અનોખી પ્રતિકૃતિ શુદ્ધ ચંદનથી બનેલી છે. એવું કહેવાય છે કે ચંદનની કોતરણીની કળા એક ઉત્કૃષ્ટ અને પ્રાચીન હસ્તકલા છે, જે દક્ષિણ ભારતમાં સદીઓથી પ્રચલિત છે. આ સુશોભિત પ્રતિકૃતિમાં દેવી સરસ્વતીની છબીઓ છે, જે શિક્ષણ, સંગીત, કળા, વાણી, જ્ઞાન અને વિદ્યાની દેવી છે, જેમાં સિતાર (વીણા) નામનું સંગીત વાદ્ય છે. તેની સાથે ભગવાન ગણેશની પ્રતિમા પણ બિરાજમાન છે. સિતાર પર રાષ્ટ્રીય પક્ષી મોરને પણ સ્થાન આપવામાં આવ્યું છે, જે સુંદર રીતે કોતરવામાં આવ્યું છે અને ભારતીય સંસ્કૃતિના અસંખ્ય અભિવ્યક્તિઓ દર્શાવે છે. ફ્રાન્સની તેમની સત્તાવાર મુલાકાત દરમિયાન, પીએમ મોદીએ ફ્રાન્સના નેતાઓને આપવામાં આવેલી ભેટોની શ્રેણી દ્વારા ભારતના સમૃદ્ધ સાંસ્કૃતિક વારસાનું પ્રદર્શન કર્યું. આ ભેટોએ માત્ર ભારતની કારીગરી અને કલાત્મક પરંપરાની જ ઉજવણી કરી નથી, પરંતુ બંને દેશો વચ્ચે મિત્રતા અને પરસ્પર સમજણના બંધનને પણ મજબૂત બનાવ્યું છે. પીએમ મોદીએ રાષ્ટ્રપતિ મેક્રોન સાથે સંયુક્ત પત્રકાર પરિષદ યોજી હતી, જેમાં તેમણે ભવ્ય સ્વાગત માટે મેક્રોનનો આભાર માન્યો હતો. તેમજ ફ્રાન્સના લોકોને તેમના રાષ્ટ્રીય દિવસની શુભેચ્છા અને અભિનંદન પાઠવ્યા હતા. પીએમ મોદીએ કહ્યું કે ગઈકાલે રાષ્ટ્રપતિ મેક્રોને તેમને ફ્રાન્સના સર્વશ્રેષ્ઠ રાષ્ટ્રીય પુરસ્કારથી સન્માનિત કર્યા. આ સન્માન ૧૪૦ કરોડ ભારતીયોનું સન્માન છે. પીએમએ કહ્યું કે અમે અમારી વ્યૂહાત્મક ભાગીદારીની ૨૫મી વર્ષગાંઠની ઉજવણી કરી રહ્યા છીએ. છેલ્લા ૨૫ વર્ષના મજબૂત આધાર પર અમે આવનારા ૨૫ વર્ષનો રોડમેપ તૈયાર કરી રહ્યા છીએ. આમાં બોલ્ડ અને મહત્વાકાંક્ષી લક્ષ્યો નક્કી કરવામાં આવી રહ્યા છે.
