શાહિદ કપૂરે તાજેતરમાં તેના મધ્યમ વર્ગના દિવસોને યાદ કર્યા. તેણે કહ્યું કે પંકજ કપૂર અને નીલિમા અઝીમનો પુત્ર હોવા છતાં પણ તે ફિલ્મ ઈન્ડસ્ટ્રીમાં બહારની વ્યક્તિ જેવો અનુભવ કરે છે. તેના બાળપણના દિવસોને યાદ કરતા અભિનેતાએ કહ્યું કે જ્યારે તે ત્રણ વર્ષનો હતો ત્યારે તેના માતાપિતાએ છૂટાછેડા લીધા હતા. તેના માતા-પિતાના અલગ થયા પછી, તે તેની માતા સાથે રહેવા લાગ્યો, જેમણે તેને એકલા ઉછેર્યો. શાહિદે કહ્યું કે તેના પિતા સાથે પણ સારા સંબંધો છે.
પરંતુ ઇન્ડસ્ટ્રીમાં આગળ વધવા માટે તેણે ક્યારેય તેના પિતાની કોઈ મદદ કે સલાહ લીધી નથી. શાહિદ કપૂરે ફેય ડિસોઝા સાથેની વાતચીત દરમિયાન તેના બાળપણ સાથે જોડાયેલ એક કિસ્સો શેર કર્યો હતો. તેણે કહ્યું, ‘હું મારા પિતાને ઓળખતો હતો અને અમારી વચ્ચે સારા સંબંધો હતા, પરંતુ હું ત્રણ વર્ષનો હતો ત્યારથી મારી માતા સાથે હતો. મને યાદ છે કે જ્યારે ઈશાનનો જન્મ થયો ત્યારે હું 14 વર્ષનો હતો અને મારી માતાએ અભિનય છોડી દીધો હતો કારણ કે તેણે ઈશાનનું ધ્યાન રાખવાનું હતું.
ઈશાનનો જન્મ થયો ત્યારે તે 35-36 વર્ષની હતી, અને તે ઉંમરે બાળક હોવું સરળ નથી. 14 વર્ષના પુત્ર સાથે વર્કિંગ વુમન હોવાને કારણે, મુંબઈમાં રહેવું અને બીજા લગ્ન, આ બધું તેના માટે ઘણું મુશ્કેલ હતું. ઈશાન થોડો મોટો થયા પછી તે ફરીથી એક્ટિંગ કરવા માંગતી હતી પરંતુ તે એટલું સરળ નહોતું કારણ કે લોકો તને ભૂલી જાય છે. માતા બધું જાતે જ મેનેજ કરવાનો પ્રયાસ કરતી હતી, અને તે સમયે અમે ભાડાના મકાનમાં રહેતા હતા.