સાંસદ તરીકે ચૂંટાયા બાદ કંગના રનૌતે આજે પહેલીવાર ગૃહમાં ભાષણ આપ્યું હતું. પોતાના પહેલા ભાષણમાં તેમણે સંસદીય ક્ષેત્ર મંડીની સમસ્યાઓ ઉઠાવી હતી. કંગનાએ કહ્યું કે મંડી વિસ્તારમાં ઘણી કલા શૈલીઓ છે, જે સમયની સાથે લુપ્ત થઈ રહી છે.
અગાઉ ઘેટાંના ચામડામાંથી જેકેટ્સ, કેપ અને શાલ સહિત ઘણાં ઊની કપડાં બનાવવામાં આવતાં હતાં. વિદેશોમાં તેનું ઘણું મહત્ત્વ છે, પરંતુ અહીં કપડાં બનાવવાની આ પદ્ધતિનો અંત આવી રહ્યો છે. કંગનાએ કહ્યું કે હિમાચલ પ્રદેશનું લોકસંગીત પણ ધીમે ધીમે લુપ્ત થઈ રહ્યું છે, તેને બચાવવા માટે સરકાર દ્વારા પગલાં ભરવા જોઈએ.
સ્પીકર ઓમ બિરલાનો તક આપવા બદલ આભાર માન્યો
કંગના રનૌત ભાજપની ટિકિટ પર સાંસદ તરીકે ચૂંટાઈને પહેલીવાર લોકસભા પહોંચી છે. નવી લોકસભાની રચના બાદ આજે તેમને પહેલીવાર ગૃહમાં બોલવાની તક મળી. સૌથી પહેલા તેમણે સ્પીકર ઓમ બિરલાનો બોલવાની તક આપવા બદલ આભાર માન્યો હતો.
આ પછી તેણે પોતાનું ભાષણ શરૂ કર્યું. તેમણે કહ્યું- ઘેટાંના ઊનથી બનેલા જેકેટ્સ, કેપ, શાલ અને સ્વેટર વિદેશમાં ખૂબ મૂલ્યવાન છે. પરંતુ આપણા દેશમાં તેઓ લુપ્ત થઈ રહ્યા છે. એ જ રીતે, આદિવાસી વિસ્તારો લાહૌલ સ્પીતિ, કિન્નૌર અને ભરમૌરના લોક સંગીતની સાથે, સ્થાનિક પોશાકો પણ તેમની ઓળખ ગુમાવી રહ્યા છે. સ્પીકર સાહેબ, કૃપા કરીને અમને જણાવો કે આ માટે કયા જરૂરી પ્રયાસો કરવામાં આવી રહ્યા છે?