સાયન્સ સિટીમાં રોબોટીક ગેલેરી પાસે હ્યુમન એન્ડ બાયોલોજિકલ સાયન્સ ગેલેરીનું ખાતમુહુર્ત કરાયું છે. 316 કરોડમાં બનનારી આ ગેલેરી 19 હજાર ચોરસ મીટરમાં પથરાયેલી હશે. ગેલેરીમાં 10થી વધુ સેન્ટ્રલ એક્ઝિબિટ્સ અને 140 પેટા પ્રદર્શનો સાથે કુલ 150 પ્રદર્શનની યોજના છે. બાળકોથી માંડીને દરેક વ્યક્તિ સરળ ભાષામાં સમજી શકે તે રીતે જુદા જુદા 7-8 ઝોન બનાવવામાં આવશે.
ઉપરાંત ગેલેરીમાં યુટીલિટી સેવાઓ, ક્યુરેટ ઓફિસ સ્પેસ, કાફેટેરિયા પણ હશે. સેલ (કોષ)ના આકારમાં બનનારી ગેલેરીમાં દરેક પ્રદર્શનને યોગ્ય રીતે રજૂ કરવા ધોરણ 6થી 12ના એનસીઆઈઆરટીના પુસ્તકોનો અભ્યાસ કરાયો છે. પૃથ્વી પરના બીજા સજીવો વિશે લોકો માહિતગાર થાય અને તેમનું અસ્તિત્વ જળવાય તેવા હેતુથી ગેલેરી બનાવાઈ રહી છે.
દવા બનાવવા ઉપયોગમાં લેવાતી વનસ્પતિ સહિતની 7 ગેલેરી જોવા મળશે
બે વર્ષમાં સાયન્સ ગેલેરી તૈયાર થઈ જશે : હ્યુમન એન્ડ બાયોલોજિકલ સાયન્સ ગલેરી બનાવવાનો વિચાર વર્ષ 2022માં આવ્યો હતો. ડિઝાઈન ફાઈનલ થયા બાદ કામગીરી શરૂ કરાઈ છે. કોષ આકારની આ ગેલેરી બે વર્ષમાં તૈયાર થઈ જાય તે રીતે કામ શરૂ કરવામાં આવ્યું છે.