વરસાદથી અસહ્ય બફારા વચ્ચે લોકોને ગરમીમાંથી રાહત મળી
જેતપુર સહિત ગ્રામ્ય પંથકમાં આજે સવારથી જ વાદળછાંયુ વાતાવરણ જોવા મળી રહ્યું છે. પરંતુ બપોર બાદ જેતપુર પંથકમાં વાતાવરણમાં અચાનક પલ્ટો જોવા મળ્યો હતો. જેતપુરના ગ્રામ્ય વિસ્તારમાં ધીમીધારે વરસાદ વરસતા કપાસ, મગફળી, મગ, મકાઇ, અડદ, એરંડા સહિતના પાકને નવું જીવનદાન મળ્યું છે.
જેતપુર પંથકમાં સવારથી જ વાદળછાંયું વાતાવરણ જોવા મળ્યું હતું. ત્યારે બપોર બાદ જેતપુરનાં ખીરસરા, ખજુરી ગુંદાળા, સ્ટેશન વાવડી,ચારણીયા,વીરપુર,કાગવડ, મેવાસા સહિત ગ્રામ્ય વિસ્તારમાં લાંબા સમય સુધી વિરામ બાદ વીજળીના કડાકા ભડાકા સાથે વરસાદ શરૂ થયો હતો. ખેડૂતો કાગડોળે વરસાદની રાહ જોઈ રહ્યા હતા અને વરસાદ શરૂ થતાં ખેડૂતોમાં ધોધમાર વરસાદની આશા બંધાણી છે. વરસાદથી વાતાવરણમાં પણ ઠંડક પ્રસરી હતી અને લોકોને અસહ્ય ઉકળાટમાંથી રાહત મળી છે.
છેલ્લા 15 દિવસના વધુ સમય પછી પણ મેઘરાજાએ ડોક્યુ ન કરતા ખેડૂતો ચિંતામાં મુકાયા છે. હાલ કપાસ, મગફળી સહિતનો પાક સૂકાવા લાગ્યો હતો ત્યારે આજે ગ્રામ્ય પંથકમાં વરસાદ વરસતા મુરજાતા પાકને જીવતદાન મળ્યું છે.