ગીર સોમનાથ આરોગ્ય વિભાગ સમગ્ર જિલ્લાના છેવાડાના ગામોમાં અવિરત આરોગ્ય સેવાઓ આપે છે. વેરાવળ તાલુકાના છેવાડાના ગામોમાં આરોગ્ય સેવા આપતા દેદાને રાષ્ટ્રીય કક્ષાનો NQAS (નેશનલ ક્વોલીટી એસ્યોરન્સ સ્ટાન્ડર્ડ) એવોર્ડ પ્રાપ્ત થયો છે. ગુણવત્તા, જ્ઞાન, કૌશલ્ય, ઇન્ફેકશન કંટ્રોલ અને સ્વચ્છતાલક્ષી સ્વાસ્થ્ય સુવિધાઓ, દર્દીઓમાં જાગૃતિ લાવવાની કામગીરી તથા આરોગ્યને લગતી વિવિધ સુવિધાઓ પ્રદાન કરવા સબબ દેદા હેલ્થ એન્ડ વેલનેસ સેન્ટરને આ એવોર્ડ એનાયત કરવામાં આવ્યો છે.
ભારત સરકારના આરોગ્ય અને પરિવાર કલ્યાણ મંત્રાલય દ્વારા ગુણવત્તાયુક્ત કામગીરી કરનારા હેલ્થ એન્ડ વેલનેસ સેન્ટર દેદાને ભારત સરકાર દ્વારા રાષ્ટ્રીય ગુણવત્તા ખાતરી ધોરણ (NQAS) પ્રોગ્રામ હેઠળ તજજ્ઞો દ્વારા આરોગ્ય કેન્દ્રની કામગીરીના મૂલ્યાંકન બાદ એવોર્ડ માટે પસંદગી કરવામાં આવી હતી. કેન્દ્ર સરકારના તજજ્ઞો દ્વારા દેદા હેલ્થ એન્ડ વેલનેસ સેન્ટરના વિવિધ વિભાગો દ્વારા થતી કામગીરી, આરોગ્યલક્ષી સેવાઓનું બારીકાઈથી મૂલ્યાંકન કરી તેનો અહેવાલ ભારત સરકારમાં રજૂ કરવામાં આવ્યો હતો. જેમાં 84.96% ટકા સ્કોર મેળવી દેદા હેલ્થ એન્ડ વેલનેસ સેન્ટરને નેશનલ લેવલનું પ્રમાણપત્ર આપવામાં આવ્યું છે.
હેલ્થ એન્ડ વેલનેસ સેન્ટરને રાજ્ય કક્ષાએ અને રાષ્ટ્રીય કક્ષાએ ગૌરવ અપાવવામાં ગીર સોમનાથ જિલ્લાના મુખ્ય જિલ્લા આરોગ્ય અધિકારી ડૉ. અરુણ રોય, અધિક જિલ્લા આરોગ્ય અધિકારી ડો.પી.એન.બરુઆ, ક્વોલીટી એસ્યોરન્સ મેડિકલ ઓફિસર ડૉ. એચ.ટી.કણસાગરા, એપેડેમીક મેડીકલ ઓફિસર ડૉ. દિવ્યેશ ગોસ્વામી, જયસુખ ભાઈ ગોરડ, પારૂલબેન ખાણીયા, ડૉ.સંજય ગોહિલ અને આયુષ્માન આરોગ્ય મંદિર દેદાના તમામ સ્ટાફે બહુમૂલ્ય યોગદાન આપ્યું છે.
પ્રાથમિક આરોગ્ય કેન્દ્ર દેદાના મેડિકલ ઓફિસર ડોક્ટર રાજદીપસિંહ, આયુષ્માન આરોગ્ય મંદિર દેદાના CHO જાગૃતિ બી. સોલંકી FHW ચાંદની આર. કછોટ, MPKW અંકિત એચ. જોશી આશા ફેસીલીટીવર્કર રતનબેન મોકરીયા તથા દેદા સેન્ટરના તમામ આશા બહેનો સહિતના સ્ટાફે બહુમૂલ્ય યોગદાન આપ્યું છે.
